ໃນວັນທີ 1 ເມສາທີ່ຜ່ານມາ ສຳນັກຂ່າວຊິວຫົວ (Xinhua) ລາຍງານວ່າ ລັດຖະບານເຂດບໍລິຫານພິເສດຂອງຮົງກົງໄດ້ອອກມາເປິດເຜີຍວ່າ ແມວລ້ຽງຂອງຜູ້ປ່ວຍຕິດເຊື້ອພະຍາດໄວຣັສໂຄວິດ-19 ຄົນໜຶ່ງ ມິຜົນການກວດສອບໄວຣັສອອກມາເປັນບວກ. ແມວດັ່ງກ່າວກໍ່ໄດ້ຖືກກັກໂຕທີ່ສູນດູແລສັດ ແຖວທ່າເຮືອຮົງກົງຂອງສະພານຮົງກົງ-ຈູໄຫ່-ມາເກົ໊າ ໃນວັນທີ 30 ມີນາທີ່ຜ່ານມາ.
ສຳນັກງານກະເສດ, ປະມົງ ແລະ ການອະນຸຮັກຂອງຮົງກົງໄດ້ເກັບຕົວຢ່າງຈາກແມວໄປກວດສອບຫາໄວຣັສແລະເຫັນຜົນຕົວຢ່າງຈາກຊ່ອງປາກ, ຮູດັງ ແລະ ທະວານໜັກ ອອກມາເປັນບວກ. ໂຄສົກສຳນັກງານໄດ້ລະບຸວ່າແມວໂຕນີ້ບໍ່ສະແດງອາການ ພ້ອມກັນນີ້ ເຈົ້າໜ້າທີ່ຈະຕິດຕາມອາການຢ່າງໃກ້ຊິດ ແລະ ຈະກວດຫາເຊື້ອໄວຣັສອິກເທື່ອໜິ່ງ. ກ່ອນໜ້ານີ້, ທາງການກໍ່ໄດ້ກວດພົບເຊື້ອໄວຣັສໂຄວິດ-19 ຈາກໝາລ້ຽງສອງໂຕ ເຊິ່ງມີຜົນກວດອອກມາເປັນບວກຢ່າງອ່ອນ ຫຼື ເປັນບວກຈາກການກວດສອບຊ້ຳ. ທາງໂຄສົກສຳນັກງານ ກໍ່ໄດ້ອອກມາແນະນຳໃຫ້ເຈົ້າຂອງສັດລ້ຽງລູກດ້ວຍນົມເຊັ່ນໝາ ແລະ ແມວ ເອົາມາກັກໂຕຢູ່ທີ່ສູນຂອງສຳນັກງານ ເພື່ອເປັນການປ້ອງກັນສຸຂະພາບຂອງປະຊາຊົນ ແລະ ສັດ.
ໂຄສົກຂອງສຳນັກງານດັ່ງກ່າວກໍ່ໄດ້ກ່າວເພີ່ມຕື່ມວ່າ ປັດຈຸບັນຍັງບໍ່ມີຫຼັກຖານທີ່ວ່າສັດລ້ຽງເປັນພາຫະນະຂອງເຊື້ອໄວຣັສໂຄວິດ-19 ພ້ອມແນະນຳໃຫ້ເຈົ້າຂອງສັດລ້ຽງຮັກສາສຸຂະອະນາໄມຢູ່ສະເໝີ ແລະ ບໍ່ຄວນປະຖິ້ມສັດລ້ຽງບໍ່ວ່າຊິເກີດຫຍັງຂຶ້ນ
ຮຽບຮຽງໂດຍ: ວະນິດາ
ແຫຼ່ງຂ່າວ: Thai PBS