ປະຈຸບັນ ລາຄາຫນ້າກາກປິດປາກ ທີ່ຂາຍຢູ່ ສປປ ລາວ ແມ່ນມີລາຄາເພີ່ມສູງຂຶ້ນ ຫຼາຍກ່ວາ 10 ເທົ່າ ເມື່ອທຽບໃສ່ ລາຄາ ກ່ອນການແຜ່ລະບາດຂອງເຊື້ອໂຄວິດ-19.
ເພື່ອສະໜອງໜ້າກາກອານາໄມໃຫ້ພຽງພໍກັບຄວາມຕ້ອງການ ແລະ ແຊກແຊງລາຄາໜ້າກາກອານາໄມທີ່ຂາຍໃນທ້ອງຕະຫຼາດທີ່ມີລາຄາສູງ ທາງລັດຖະບານລາວກໍ່ຄືກະຊວງສາທາລະນະສຸກ ຮ່ວມກັບກະຊວງອຸດສາຫະກຳ ແລະ ການຄ້າ ໄດ້ມີແຜນສັ່ງຊື້ໜ້າກາກອານາໄມຈາກປະເທດຫວຽດນາມໃນລ໋ອດທຳອິດ ເປັນຈຳນວນ 2 ລ້ານແຜ່ນ ໂດຍໃນນີ້ 1.5 ລ້ານແຜ່ນ ແມ່ນຈະມອບໃຫ້ ພະນັກງານແພດໝໍ ທີ່ເຮັດວຽກ ໃນໂຮງໝໍ ແລະ ຄົນເຈັບ ທີ່ມາຮັກສາໂຕ ຢູ່ໂຮງໝໍ, ສ່ວນອີກ 500,000 ແຜ່ນ ແມ່ນຈະເປີດຂາຍ ໃຫ້ປະຊາຊົນທົ່ວໄປຊື້.
ການສັ່ງເຂົ້າໜ້າກາກປິດປາກ ຈາກຫວຽດນາມ ໃນເທື່ອນີ້ ເປັນການຮ້ອງຂໍພິເສດ ຈາກລັດຖະບານລາວ ເຖິງລັດຖະບານຫວຽດນາມ, ເພາະໃນປະຈຸບັນ ສສ ຫວຽດນາມ ແມ່ນສັ່ງໂຈະ ການສົ່ງອອກໜ້າກາກປິດປາກ ໄປຕ່າງປະເທດ ແລະ ຝ່າຍ ສສ ຫວຽດນາມ ກໍ່ເຫັນດີ ຮັບເອົາຂໍ້ສະເໜີ ຂອງລາວ ເພາະເປັນການພົວພັນພິເສດ ຂອງສອງປະເທດ ແລະ ປະມານເດືອນ ເມສາ 2020 ຈະມີໂຮງງານ ຈາກປະເທດເພື່ອນບ້ານ ເຂົ້າມາເປີດໂຮງງານ ຜະລິດໜ້າກາກປິດປາກ ຢູ່ ສປປ ລາວ ຊຶ່ງຄາດວ່າ ຈະຜະລິດຫນ້າກາກໄດ້ 500,000 ຜືນ ຕໍ່ເດືອນ.
ຂ່າວໂດຍ: ພຸດສະດີ
ແຫຼ່ງຂໍ້ມູນ: ວຽງຈັນທາມ