ງານ ວິວາເຮັດໃຫ້ສາວໆ ສ່ວນໃຫຍ່ຕື່ນເຕັ້ນກັບມື້ສຳຄັນເຊັ່ນນີ້ ແຕ່ກໍມີວ່າທີ່ເຈົ້າສາວບໍ່ໜ້ອຍທີ່ກັງວົນກ່ຽວກັບຊຸດແຕ່ງດອງ ລວມທັງອົງປະກອບອື່ນໆ ພວກເຮົາຈຶ່ງມີທິບສ໌ດີໆ ຈາກເວັບໄຊ stylecaster ມາແນະນຳກັນ ເພື່ອຊ່ວຍໃຫ້ເຈົ້າຕັດສິນໃຈເລືອກຊື້ຊຸດແຕ່ງດອງໄດ້ງ່າຍຂຶ້ນ
1. ເປັນຕົວຂອງຕົວເອງ
ບໍ່ວ່າຈະຢ່າງໃດກໍຕາມຢ່າລືມຄິດເຖິງຄວາມເປັນໂຕເຈົ້າເອງ ບໍ່ວ່າເຈົ້າຈະເປັນສາວຫ້າວ ສາວຫວານ ຫລືສາວອາລ໌ທິສ ກໍໃຫ້ເລືອກຊຸດແຕ່ງດອງໃນແບບທີ່ເຈົ້າເປັນດີກວ່າ ອີກທັງໃນເລື່ອງຂອງການແຕ່ງໜ້າເຮັດຜົມກໍເຊັ່ນກັນ ເຖິງວ່າມື້ນັ້ນເຈົ້າຈະຕ້ອງໂດດເດັ່ນທີ່ສຸດໃນງານ ແຕ່ກໍບໍ່ຈຳເປັນຕ້ອງເອົາທຸກຢ່າງໄວ້ເທິງຕົວ ບໍ່ແມ່ນວ່າຂະໜາດເຈົ້າບ່າວເອງເກືອບຈື່ບໍ່ໄດ້ ແບບນີ້ກໍໂອເວີເກີນໄປ ເອົາເປັນວ່າແຕ່ງແບບພໍດີໆ ບໍ່ຫລາຍ ຫລື ໜ້ອຍເກີນໄປ ແບບນີ້ຄາດສິກກວ່າຫລາຍ
2. ເກີບ
ເກີບຖືເປັນອີກອົງປະກອບທີ່ສຳຄັນ ບໍ່ແພ້ຊຸດແຕ່ງດອງ ແຖມມັນຍັງເຮັດໃຫ້ເຈົ້າງາມສະຫງ່າຂຶ້ນອີກ ທັງນີ້ທັງນັ້ນກໍຕ້ອງເລືອກເກີບໃຫ້ເຂົ້າກັບຊຸດແຕ່ງດອງນຳ ບໍ່ວ່າຈະເປັນແບບຫຸ້ມສົ້ນ, ຮັດສົ້ນ ຫລື ແບບເປືອຍ ລວມທັງສີຂອງເກີບນຳທີ່ຕ້ອງແມຊ໌ກັບຊຸດແຕ່ງດອງ ນອກຈາກນີ້ວັດສະດຸທີ່ໃຊ້ເຮັດເກີບກໍສຳຄັນບໍ່ແພ້ກັນ ບໍ່ວ່າຈະເປັນໜັງ, ຜ້າ ຫລື ຫຍັງກໍຕາມ ຄວນເລືອກເກີບທີ່ໃສ່ສະບາຍ ເກີບທຸກອະລິຍາບົດຂອງເຈົ້າໃນມື້ນັ້ນ ເຊັ່ນ ພິທີໃສ່ແຫວນທີ່ເຈົ້າຕ້ອງນັ່ງກັບພື້ນ, ຍືນຕ້ອນຮັບແຂກ ແລະ ອື່ນໆ ຄືຊິບໍ່ດີແນ່ນອນຫາກມື້ນັ້ນເຈົ້າຈະຍ່າງຂະເຢັງ ເພາະຖືກເກີບກັດ ຫລື ເກີບຂາດ ຂະນະຍ່າງຂຶ້ນເວທີ
3. ກຽມເສື້ອຊ້ອນໄປນຳ
ຢ່າງົງ ວ່າຈະກຽມເສື້ອຊ້ອນໄປເປັນຫຍັງ ໃນວັນທີ່ເຈົ້າໄປລອງເລືອກຊຸດແຕ່ງດອງນັ້ນ ແນ່ນອນວ່າເຈົ້າອາດຈະຖືກໃຈຫລາຍແບບ ເຊັ່ນ ຊຸດໂຊບ່າ, ຊຸດເກາະອົກ, ແຂນສັ້ນ-ຍາວ ແລະ ອື່ນໆ ເວລາລອງຊຸດເຫລົ່ານັ້ນຄວນເຮັດຄືວ່າມັນຄືມື້ຈິງທີ່ເຈົ້າຕ້ອງ ໃສ່ ເຈົ້າຈຶ່ງຈຳເປັນຕ້ອງກຽມເສື້ອຊ້ອນຫລາກຫລາຍແບບໄປປ່ຽນໃຫ້ເຂົ້າ ກັບຊຸດແຕ່ງດອງນຳ ເຊັ່ນ ຊຸດແຕ່ງດອງແບບເກາະອົກກໍຄວນໃສ່ເສື້ອຊ້ອນແບບເກາະອົກໄວ້ດ້ານໃນ ຈະໄດ້ຮູ້ວ່າໃສ່ແລ້ວຈະອອກມາເປັນຢ່າງໃດ ແລະ ອື່ນໆ ຢ່າລືມວ່າບໍ່ແມ່ນພຽງຊຸດແຕ່ງດອງເທົ່ານັ້ນທີ່ມີຫລາຍຮູບຊົງ ເສື້ອຊ້ອນຂອງສາວໆ ເອງກໍເຊັ່ນກັນ ດັ່ງນັ້ນເລືອກໃສ່ໃຫ້ແມຊ໌ ແລະ ເໝາະສົມນຳ ຈະໄດ້ງາມ ພໍດີ ແລະ ໝັ່ນໃຈຫລາຍຂຶ້ນ
4. ຕັ້ງງົບຄ່າວໆໄວ້
ຈັ່ງໃດ ກໍງາມໄປໝົດ ບໍ່ວ່າຈະເປັນຊຸດ ເກີບ ຫລື ເຄື່ອງປະດັບ ຫາກຈະກວດຊື້ທັງໝົດກໍອາດຈະບໍ່ແມ່ນເລື່ອງ ເພາະອາດຈະບໍ່ມີເຈົ້າສາວຄົນໃດທີ່ຈະຫອບໃສ່ສາຍສະພາຍສອງເສັ້ນ ຫລື ຕ່າງຫູສອງຄູ່ໃນເວລາ ດຽວກັນດອກ ແລະ ການຈະຊື້ເກີບຫລາຍຄູ່ ຫລື ສາຍສະພາຍຫລາຍເສັ້ນໄວ້ເຜື່ອເລືອກ ກໍບໍ່ແມ່ນເລື່ອງ ທີ່ດີດອກ ເພາະຈະເຮັດໃຫ້ສິ້ນເປືອງລ້າໆ ດັ່ງນັ້ນກ່ອນຈະຊື້ທຸກສິ່ງທຸກຢ່າງຄວນຕັ້ງງົບຄ່າວໆໄວ້ນຳ ເຊັ່ນ ງົບ 2,500,000 ກີບ ແບ່ງເປັນຈັກສ່ວນ ແລະ ມີຫຍັງແນ່ ທີ່ຕ້ອງຊື້ ລິສເອົາໄວ້ໃຫ້ໝົດ ແລ້ວມາບໍລິຫານອີກເທື່ອໜຶ່ງວ່າຄວນຊື້ຊຸດແຕ່ງດອງ, ເກີບ ຫລື ເຄື່ອງປະດັບໃນລາຄາເທົ່າໃດ
5. ເສື້ອຜ້າ ໜ້າຜົມ ເໝາະກັບສະຖານທີ່ຈັດງານ
ອາດຈະບໍ່ດີແທ້ ຫາກເຈົ້າຈະແຕ່ງຕົວແຕ່ງໜ້າຈັດເຕັມເພື່ອມາປະກອບພິທີແຄມຫາດ ໃນຍາມຕອນສວຍ ເພາະອາດຈະເຮັດໃຫ້ໜ້າຂອງເຈົ້າໜຽວດ້ວຍເຫື່ອໄຄ ແລະ ເຄື່ອງສຳອາງທີ່ໄຫລຍ້ອຍ ຫລື ຊຸດແຕ່ງດອງລ່າມໆໃນສະຖານທີ່ຄັບແຄບ ເປັນຕົ້ນ ນອກຈາກນີ້ຄວນເລືອກເກີບໃຫ້ເຂົ້າກັບສະຖານທີ່ນຳ ເຊັ່ນກັນເພາະອາດຈະບໍ່ດີແທ້ ຫາກຈະໃສ່ເກີບສົ້ນສູງ ຍ່າງຢູ່ແຄມຫາດ ຫລື ໃຜທີ່ແຕ່ງດອງ ທ່າມກາງສວນສີຂຽວ ເພາະຢາກມີບັນຢາກາດສະບາຍໆ ແບບທຳມະຊາດ ແຕ່ພັດແຕ່ງໜ້າແຕ່ງຕົວມາແບບເໜືອທຳມະຊາດກໍອາດຈະບໍ່ງາມ ຢ່າລືມວ່າແສງໃນທີ່ຮົ່ມກັບແສງກາງແຈ້ງໃຫ້ຄວາມສະຫວ່າງຕ່າງກັນ ການແຕ່ງໜ້າຂອງເຈົ້າຈຶ່ງຈຳເປັນຕ້ອງຄຳນຶງເຖິງຮູບພາບທີ່ຖ່າຍ ອອກມານຳ
6. ຊວນໝູ່ສະນິດ ຫລື ຄົນຮູ້ໃຈໄປນຳ
ມື້ສຳຄັນທັງເທື່ອ ສາວໆ ອາດຈະມີຫຍັງໃຫ້ຄິດ ແລະ ຕັດສິນໃຈຫລາຍຢ່າງ ແລະ ອາດຈະດີບໍ່ຫລາຍ ຫາກວ່າມີໝູ່ ຫລື ຄົນຮູ້ໃຈມາຊ່ວຍເລືອກສັນ ຫລື ຊ່ວຍຕັດສິນໃຈ ເລືອກຊຸດແຕ່ງດອງຂອງເຈົ້າ ແຕ່ທັງນີ້ກໍບໍ່ຄວນຍົກໂຂຍົງພາກັນມາຕັ້ງແຕ່ເພື່ອນຮຽນປະຖົມ ມັດຍົມ ຫລືມະຫາວິທະຍາໄລ ແຕ່ຄວນຊວນເພື່ອນທີ່ຮູ້ໃຈເຈົ້າແທ້ໆ ພ້ອມທັງຮູ້ວ່າເຈົ້າເໝາະກັບສະໄຕລ໌ໃດ ແລະ ບໍ່ລືມຄວາມເປັນຕົວຕົນຂອງເຈົ້າເອງ ເຊື່ອວ່າຈະເຮັດໃຫ້ເຈົ້າຕັດສິນໃຈງ່າຍຂຶ້ນຫລາຍ
7. ມັນເປັນມື້ຂອງທ່ານ
ວ່າທີ່ເຈົ້າສາວ ບໍ່ໜ້ອຍທີ່ກັງວົນເລື່ອງແບບ ແລະ ສະໄຕລ໌ຂອງຊຸດແຕ່ງດອງ ເພາະພາບທີ່ເຮົາເຫັນໂດຍທົ່ວໄປຊຸດແຕ່ງດອງ ຈະມີສີຂາວແຕ່ງດ້ວຍລາຍດອກ ຫລື ບໍ່ກໍລູກໄມ້ ຫລື ຫຍັງກໍຕາມທີ່ເຈົ້າເຫັນມາ ຖ້າຫາກວ່າເຈົ້າບໍ່ມັກກໍບໍ່ຈຳເປັນຕ້ອງແຕ່ງຕາມແບບນັ້ນ ຢ່າລືມວ່າມັນຄືມື້ຂອງເຈົ້າ ເລືອກໃນສິ່ງທີ່ເຈົ້າມັກ ບໍ່ວ່າຈະເປັນຊຸດແຕ່ງດອງ, ເກີບ, ເຄື່ອງປະດັບ, ຊົງຜົມ, ສີເລັບ ຈົນຮອດສີລິບສະຕິກ ໃຜວ່າເຈົ້າສາວຕ້ອງທາປາກດ້ວຍລິບສະຕິກສີບົວ ຫລື ທາເລັບສີອ່ອນໆ ສະເໝີໄປ ເພາະຖ້າຫາກວ່າເຈົ້າເປັນສາວຫ້າວກໍຈັດເຕັມໄປເລີຍ ຫລື ຖ້າຫາກວ່າເຈົ້າເປັນສາວຫວານກໍຫວານໃຫ້ສຸດໆໄປເລີຍ