ເກືອບ 2 ໃນ 3 ຂອງຜູ້ຕິດເຊື້ອໂຄວິດ-19 ຈໍານວນ 554 ກໍລະນີໃນປະເທດມາເລເຊຍກ່ຽວຂ້ອງກັບການຊຸມນຸມທາງສາສະໜາ ເຮັດໃຫ້ໃນຕອນນີ້ ມາເລເຊຍ ກາຍເປັນປະເທດທີ່ໄດ້ຮັບຜົນກະທົບຮ້າຍແຮງທີ່ສຸດໃນອາຊີຕາເວັນອອກສ່ຽງໃຕ້.
ສຳນັກຂ່າວ Reuter ລາຍງານຈາກນະຄອນຫຼວງ ກົວລາລໍາເປີ ປະເທດມາເລເຊຍ ໃນວັນທີ 16 ມີນາວ່າ ມາເລເຊຍພົບຜູ້ຕິດເຊື້ອໄວຣັສໂຄໂຣນາສາຍພັນໃໝ່ ຫຼື ໂຄວິດ-19 ຈໍານວນ 125 ກໍລະນີ ໃນວັນທີ 16 ມີນາ 2020 ນັບເປັນໂຕເລກສູງສຸດ ເປັນອັນດັບສອງທີ່ເພີ່ມຂຶ້ນລາຍວັນໃນມາເລເຊຍ ສ່ວນໃຫຍ່ຈະເປັນຜູ້ທີ່ກ່ຽວຂ້ອງກັບການຊຸມນຸມທາງສາສະໜາທີ່ມັສຍິດແຫ່ງໜຶ່ງ ໃນນະຄອນຫຼວງກົວລາລໍາເປີ ປະເທດ ມາເລເຊຍ ໃນລະຫວ່າງວັນທີ 28 ກຸມພາ ຈົນເຖິງ 1 ມີນາ ທີ່ຜ່ານມາ ໂດຍມາເລເຊຍພົບຜູ້ຕິດເຊື້ອແລ້ວ 553 ກໍລະນີ.
ກິດຈະກຳດັ່ງກ່າວມີຜູ້ໄປເຂົ້າຮ່ວມ 16.000 ຄົນຈາກຫຼາຍປະເທດ ແລະ ຈັດຂຶ້ນໃນຊ່ວງທີ່ມາເລເຊຍ ປະເຊີນກັບຄວາມວຸ້ນວາຍທາງການເມືອງ ອັນເນື່ອງມາຈາກການປະກາດລາອອກຈາກຕໍາແໜ່ງນາຍົກລັດຖະມົນຕີຂອງ ດຣ ມາຫາເທ ໂມຮໍາມັດ ສຳລັບຊາວມາເລເຊຍທີ່ເຂົ້າຮ່ວມການຊຸມນຸມທາງສາສະໜາດັ່ງກ່າວມີຈໍານວນ 14,500 ຄົນ, ແຕ່ມີພຽງປະມານ 7000 ຄົນເທົ່ານັ້ນທີ່ໄປຮັບການກວດຫາເຊື້ອໄວຣັສ.
ກຸ່ມສາສະໜາໄດ້ຂໍຮ້ອງໃຫ້ຜູ້ເຂົ້າຮ່ວມຊຸມນຸມທຸກຄົນເຂົ້າຮັບການກວດຫາເຊື້ອໄວຣັສ. ນອກຈາກນັ້ນ, ການຊຸມນຸມທາງສາສະໜາຍັງໄດ້ເຮັດໃຫ້ມີການຕິດເຊື້ອລາຍໃໝ່ໃນປະເທດສິງກະໂປ ແລະ ບຣູໄນພ້ອມ ໂດຍສິງກະໂປໄດ້ສັ່ງປິດມັສຍິດທັງໝົດແລ້ວ ຕັ້ງແຕ່ວັນສຸກທີ່ຜ່ານມາ ຫຼັງພົບວ່າ 5 ຄົນທີ່ໄປຮ່ວມຊຸມນຸມທາງສາສະໜາໃນມາເລເຊຍຕິດເຊື້ອໄວຣັສ.
ຮຽບຮຽງຂ່າວໂດຍ: ລັດສະໝີ