ປັດຈຸບັນໄດ້ມີການກ່າວເຖິງຢາ “ຟາວິພິຣາເວຍ” ກັນໃນວົງກວ້າງ ເຊິ່ງໄດ້ມີການທົດລອງໃຊ້ທັງໃນປະເທດຈີນ ແລະ ສະຫະລັດອາເມລິກາແລ້ວ. “ຟາວິພິຣາເວຍ” (Favipiravir) ທີ່ຮູ້ຈັກກັນໃນຊື່ T-705 ຫຼື Avigan ເປັນຢາຕ້ານໄວຣັສທີ່ພັດທະນາໂດຍບໍລິສັດ ໂຕຢາມະເຄມີຄອລ ປະເທດຍີ່ປຸ່ນ ເຊິ່ງໄດ້ມີການພັດທະນາ ແລະ ທົດລອງກັບມະນຸດ ໃນເດືອນກຸມພາທີ່ຜ່ານມາ ເຊິ່ງຕົວຢາດັ່ງກ່າວມີສັບພະຄຸນຊ່ວຍຢັບຢັ້ງ RNA-dependent RNA polymerase ຂອງເຊື້ອໄວຣັສໄຂ້ຫວັດໃຫຍ່ ເຮັດໃຫ້ໄວຣັສບໍ່ສາມາດເພີ່ມຈຳນວນ ແລະ ກະຈາຍໄປທົ່ວຮ່າງກາຍໄດ້ ໂດຍໃນວັນທີ 16 ກຸມພາທີ່ຜ່ານມາ ສຳນັກງານບໍລິຫານຜະລິດຕະພັນທາງການແພດຂອງຈີນໄດ້ຮັບຮອງວ່າ ຢາດັ່ງກ່າວສາມາດຕໍ່ຕ້ານກັບໄວຣັສໂຄວິດ-19 ໄດ້ ແລະ ໃນປັດຈຸບັນບໍລິສັດ ເຈີຈຽງໄຮຊຸນ ໄດ້ຮັບການອະນຸມັດຈາກລັດຖະບານໃນການຜະລິດຢາຕົວນີ້ ແລະ ຈັດຈຳໜ່າຍ.
ນາຍແພດ ນະລົງ ອະທິກຸນວານິດ ຮອງຫົວໜ້າພະແນກກົມການແພດຂອງໄທ ກ່າວວ່າ ໃນການໃຊ້ຢາຮັກສາໂຣກໂຄວິດ-19 ຈະແບ່ງຜູ້ປ່ວຍອອກເປັນ 3 ກຸ່ມຄື: ອາການໜ້ອຍ, ອາການໜັກ ແລະ ອາການໂຄມ່າ ເຊິ່ງຕາມສະຖິຕິໃນຂະນະນີ້ ກຸ່ມຜູ້ຕິດເຊື້ອສ່ວນໃຫຍ່ 90% ແມ່ນກຸ່ມທີ່ມີອາການໜ້ອຍ ແລະ ສາມາດຫາຍເອງໄດ້ໂດຍບໍ່ຕ້ອງໃຊ້ຢາ.
ປັດຈຸບັນ, ທີ່ປະເທດໄທໄດ້ໃຊ້ຢາກັບຜູ້ປ່ວຍອາການໜັກ ຕອນນີ້ແບ່ງອອກເປັນ 2 ຕົວຢາຫຼັກຄື: ຢາຕ້ານໄວຣັສ HIV ແລະ ຢາຮັກສາໄຂ້ຫວັດໃຫຍ່. ສ່ວນຕົວຢາສຳຄັນທີ່ປະເທດຈີນໃຫ້ການຮັບຮອງຕອນນີ້ມີພຽງ 1 ຕົວຢາຄື: ຟາວິພິຣາເວຍ ເຊິ່ງໃນຂະນະນິ້ປະເທດໄທມີຢູ່ປະມານ 50,000 ເມັດ ຕອນນີ້ກຳລັງກະຈາຍຢາອອກໄປຕາມໂຮງໝໍໃຫຍ່ໃນເມືອງຕ່າງໆລວມເຖິງໂຮງໝໍລະດັບຊຸມຊົນທົ່ວປະເທດ.
ການໃຊ້ຢາຕໍ່ຜູ້ປ່ວຍໂຄວິດ-19 ຕໍ່ຜູ້ປ່ວຍ 1 ຄົນ ຈະຢູ່ທີ່ປະມານ 50 ເມັດ. ດັ່ງນັ້ນ, ຕອນນີ້ໄທມີຢາ ຟາວິພິຣາເວຍ 50,000 ເມັດ ສາມາດຮັກສາຜູ້ປ່ວຍໄດ້ 1,000 ຄົນ.
ທາງກະຊວງສາທາລະນະສຸກຂອງໄທຍອມຮັບວ່າ ຍັງບໍ່ມີສານຕັ້ງຕົ້ນໃນການຜະລິດຢາ ປັດຈຸບັນຍັງຢູ່ໃນຂັ້ນຕອນລະຫວ່າງກະກຽມ ແລະ ເຈລະຈາກັບປະເທດທີ່ມີສານຕັ້ງຕົ້ນການຜະລິດ, ສ່ວນຈະຕ້ອງມີການສຳຮອງຢາໃນການຮັກສາປະລິມານເທົ່າໃດນັ້ນ ຕ້ອງປັບໄປຕາມສະຖານະການ ແຕ່ເປົ້າໝາຍຂອງກະຊວງສາທາລະນະສຸກຄື ໃຫ້ມີຜູ້ຕິດເຊື້ອໜ້ອຍທີ່ສຸດ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: themomentum.co, PPTV HD 36