ປະຊາຊົນຮ່ອມ 7 ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ລະດົມເງິນແບບສະໝັກໃຈເກືອບ 300 ລ້ານ ເທເບຕົງເຂົ້າຮ່ອມເຮືອນຂອງຕົນເອງ.

ນັກຂ່າວທ້ອງຖິ່ນລາຍງານເມື່ອວັນທີ 9 ມີນາ 2020 ທີ່ຜ່ານມາ ຢູ່ທີ່ຮ່ອມ 7 ບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ໄດ້ມີຂະບວນການເທເບຕົງເສີມເຫຼັກຮ່ອມເຂົ້າຊຸມຊົນຢ່າງເປັນຂະບວນການຟົດຟື້ນ ມີປະຊາຊົນພາຍໃນຮ່ອມເຂົ້າຮ່ວມຢ່າງພ້ອມພຽງ.

ຮ່ອມ 07 ບ້ານ ໜອງພະຍາ, ເມືອງ ໄຊທານີ ຮ່ອມ 07 ມີຈຳນວນ 56 ຄອບຄົວ, ປະກອບມີ 3 ໜ່ວຍຄື: ໜ່ວຍ 40, 41,42 ຮ່ອມດັ່ງກ່າວເປັນທາງຮ່ອມຕັນ, ມີໄລຍະທາງ ຍາວທັງໝົດ 560 ແມັດ. ການກໍ່ສ້າງ ໜ້າທາງເບຕົງເສີມເຫຼັ້ກ ຍາວ 560 ແມັດ, ລວງກວ້າງ 5 ແມັດ, ເບຕົງໜາ 15 ຊັງຕີແມັດ, ມູນຄ່າການກໍ່ສ້າງ (ລວມສະເພາະຄ່າ ວັດສະດຸ, ຄ່ານາຍຊ່າງຈຳນວນໜື່ງ ) = 291,500,000 ກີບ (ສອງຮ້ອຍເກົ້າສິບເອັດລ້ານ ຫ້າແສນກີບ). ທຶນຮອນໃນການກໍ່ສ້າງແມ່ນໄດ້ຈາກຮູບແບບການລະດົມທຶນປະກອບສ່ວນຂອງແຕ່ລະຄອບຄົວ, ໂດຍເບື້ອງຕົ້ນໄດ້ປຶກສາຫາລື ກັບຫົວໜ້າໜວ່ຍ ເພື່ອຊອກທຸກເງື່ອນໄຂທີ່ຈະເປັນໄປໄດ້ ໂດຍມີຂັ້ນຕອນຄື:

1. ຄິດໄລ່ຕົ້ນທຶນລາຍຈ່າຍຫຼັກໆ ຄື ຊື້ວັດສະດຸເບຕົງແຫຼວ, ອຸປະກອນຈຳນວນໜຶ່ງ ແລະ ລາຍຈ່າຍອື່ນໆ ທີ່ຈຳເປັນ, ຈຶ່ງຕົກເປັນມູນຄ່າລວມໃຫ້ໜ້ອຍທີ່ສຸດ ,

2. ລະດົມທຶນປະກອບສ່ວນນຳຄອບຄົວທີ່ມີເງື່ອນໄຂ ແລະ ມີໃຈສັດທາ ເພື່ອເປັນຫຼັກກ່ອນໂດຍສາມາດລະດົມໄດ້ 10 ຄອບຄົວ ເປັນມູນຄ່າ 107 ລ້ານ …​ ສ່ວນມູນຄ່າທີ່ຍັງບໍ່ພໍຈຶ່ງເອົາມາຫານໃສ່ແຕ່ລະຄອບຄົວທີ່ຍັງເຫຼືອ ຈຳນວນ 46 ຄອບຄົວ ເທົ່າກັບ 4,000,000 ກີບຕໍ່ຄອບຄົວ.

ໂດຍໄດ້ເປີດກອງປະຊຸມເອກະພາບກັນຄັກແນ່. ສ່ວນຮູບການຈ່າຍ ຜູ້ມີເງື່ອງໄຂຈ່າຍເທື່ອດຽວກໍຈ່າຍເລີຍ ສ່ວນຜູ້ບໍ່ທັນພ້ອມແມ່ນຈ່າຍເປັນເດືອນ ໂດຍແມ່ນຄອບຄົວ ທ່ານ ນາງ ເພືອນແສງ ຄຸນຄາລັກ ເປັນຜູ້ອອກໃຫ້ກ່ອນ.

ສຳລັບຂັ້ນຕອນການປະຕິບັດແມ່ນ ລະດົມແຮງງານປະກອບສ່ວນແບບສາມັກຄີນຳກັນ.​

ປະຊາຊົນທ່ານໜຶ່ງໄດ້ໃຫ້ສຳພາດຕໍ່ນັກຂ່າວເຮົາວ່າ: ເຮືອນຂອງເຮົາຫຼັງບັກງາມໆ, ລົດຂອງເຮົາຄັນບັກແພງໆ ເຮົາກໍຍັງສ້າງໄດ້ຊື້ໄດ້ ແລ້ວຖ້າເຮົາບໍ່ສາມາດເຮັດທາງທີ່ດີໆເຂົ້າເຮືອນຂອງເຮົາໄດ້ມັນກໍບໍ່ມີຄວາມໝາຍແລະກໍເປັນຕາອາຍສັງຄົມ…