ສຳນັກຂ່າວຕ່າງປະເທດລາຍງານຈາກນະຄອນຫຼວງກຸລາລຳເປີ ປະເທດມາເລເຊຍ ເມື່ອວັນທີ 24 ກຸມພາ ວ່າ ທຳນຽບນາຍົກລັດຖະມົນຕີມາເລເຊຍອອກຖະແຫຼງການເມື່ອວັນຈັນນີ້ວ່າ ດຣ. ມະຫາເທຣະ ໂມຮຳໝັດ ໄດ້ຍື່ນໜັງສືລາອອກຈາກຕຳແໜ່ງແກ່ສົມເດັດພຣະຣາຊາທິບໍດີ ອັບດຸລເລາະ ໂດຍບໍ່ໄດ້ມີການເປີດເຜີຍລາຍລະອຽດເພີ່ມເຕີມ. ຫຼັງຈາກນັ້ນ, ດຣ. ມະຫາເທຣະ ປະກາດຂໍລາອອກຈາກຕຳແໜ່ງຫົວໜ້າພັກເບີຊາຕູອີກດ້ວຍ.
ຄວາມເຄື່ອນໄຫວດັ່ງກ່າວເກີດຂຶ້ນທ່າມກາງ ມໍລະສຸມລູກໃຫຍ່ ໄດ້ກໍ່ຕົວຂຶ້ນຢ່າງກະທັນຫັນ ເມື່ອມີລາຍງານວ່າແກນນຳຂອງພັກເບີຊາຕູຂອງ ດຣ. ມະຫາເທຣະ ໄດ້ຫາລືກັນເມື່ອອາທິດທີ່ຜ່ານມາ ຮ່ວມກັບພັກມະລາຍູ ສາມັກຄີຊາດ (ອຳໂມ) ແລະ ພັກອິສລາມມາເລເຊຍ ກາຍເປັນເຫດໃຫ້ເກີດການສັ່ນຄອນຄວາມໝັ້ນຄົງຂອງ “ປາກາຕັນ ຮາຣາປັນ” ຫຼື ພັນທະມິດແຫ່ງຊາດ ໂດຍມີພັກຄວາມຍຸດຕິທຳປວງຊົນເປັນໜຶ່ງໃນແນວຮ່ວມ.
ດຣ. ມະຫາເທຣະ ໄວອາຍຸ 94 ປີ ຄົນນີ້ຖືວ່າເປັນນັກການເມືອງທີ່ດຳລົງຕຳແໜ່ງຜູ້ນຳລັດຖະບານທີ່ຍາວນານທີ່ສຸດໃນມາເລເຊຍ ແລະ ຍາວນານທີ່ສຸດຂອງໂລກ ເຖິງແມ່ວ່າຈະໄດ້ດຳລົງຕຳແໜ່ງແບບບໍ່ຕໍ່ເນື່ອງກໍ່ຕາມ. ຕະຫຼອດໄລຍະເວລາ 22 ປີ, ດຣ.ມະຫາເທຣະ ດຳລົງຕຳແໜ່ງຫົວໜ້າພັກອຳໂມ ກ່ອນຈະລາອອກເມື່ອປີ 2006 ເພື່ອມາກໍ່ຕັ້ງພັກຂອງຕົນເອງທີ່ມີຊື່ວ່າພັກເບີຊາຕູ.
ຮຽບຮຽງຂ່າວ: ພຸດສະດີ
ແຫຼ່ງຂໍ້ມູນ: www.dailynews