ເວັບໄຊ້ຂ່າວກຸງເທບທຸລະກິດລາຍງານເມື່ອວັນທີ 5 ກຸມພາ 2020 ວ່າ ທີມນັກວິໄຈຈີນຄົ້ນພົບຢາ 2 ຊະນິດທີ່ຊ່ວຍຢຸດຈະການເຕີບໂຕຂອງໄວຣັສໂຄໂຣນາສາຍພັນໃໝ່ໄດ້ ສ່ວນທີມນັກວິໄຈອັງກິດປະສົບຄວາມສຳເລັດໃນການຫຼຸດເວລາພັດທະນາວັກຊີນຕ້ານໄວຣັສໂຄໂຣນາເຫຼືອ 14 ວັນ.
ໜັງສືພິມສາງຈຽງຂອງຈີນລາຍງານວ່າ ທີມນັກວິໄຈ ສາດສະດາຈານ ຫຼີ່ ຈວນຈ້ວນ ໜຶ່ງໃນນັກລະບາດວິທະຍາຊັ້ນນຳຂອງຈີນຈາກມະຫາວິທະຍາໄລເຈີ້ຈຽງ ປະກາດຜົນການທົດສອບເບື້ອງຕົ້ນຂອງຢາ 2 ຊະນິດຄື: ອາບິດດໍ (Abidol) ແລະ ດາຣູນາເວຍ (Darunavir) ທີ່ສາມາດຢັບຢັ້ງເຊື້ອໄວຣັສໂຄໂຣນາໃນຫ້ອງປະຕິບັດການໄດ້ຢ່າງມີປະສິດທິພາບ.
ນອກຈາກນີ້, ທ່ານ ນາງ ຫຼີ່ ຍັງແນະນຳໃຫ້ມີການບັນຈຸຢາໃໝ່ 2 ຊະນິດລວມຢູ່ໃນໂຄງການຮັກສາໄວຣັສໂຄໂຣນາສາຍພັນໃໝ່ຂອງຄະນະກຳມາທິການສຸຂະພາບແຫ່ງຊາດອີກດ້ວຍ.
ສ່ວນໃນອັງກິດ ຄະນະທີມວິທະຍາສາດຊັ້ນນຳປະກາດຄວາມສຳເລັດໃນການຫຼຸດໄລຍະເວລາໃນການພັດທະນາວັກຊີນໄວຣັສໂຄໂຣນາຈາກ 2-3 ປີ ໃຫ້ເຫຼືອພຽງ 14 ວັນ.
ຢ່າງໃດກໍ່ຕາມ ທ່ານ ແຊດທັອກ ໄດ້ກ່າວວ່າ ວັກຊີນນີ້ອາດຈະຊ້າເກີນໄປສຳລັບການລະບາດຄັ້ງນີ້ ແຕ່ຈະມີຄວາມສຳຄັນຫຼາຍຫາກເກີດມີການລະບາດໃນຄັ້ງຕໍ່ໄປ.
ປັດຈຸບັນ, ບັນດານັກວິທະຍາສາດໃນຈີນ, ສະຫະລັດ, ອົດສະຕຣາລີ ແລະ ເອີຣົບ ກຳລັງແຂ່ງຂັນກັນພັດທະນາວັກຊີນ ແລະ ຮ່ວມມືລະຫວ່າງກັນເພື່ອເຮັດໃຫ້ຂະບວນການນີ້ສຳເລັດລຸລ່ວງໄດ້ໄວຂຶ້ນ.
ຮຽບຮຽງຂ່າວ: ພຸດສະດີ