ສຳນັກຂ່າວ People’s Daily ຂອງລັດຖະບານຈີນລາຍງານວ່າໂຮງໝໍຫົ່ວເສິນຊານທີ່ສ້າງຂຶ້ນຢ່າງຮີບດ່ວນເມື່ອວັນທີ 23 ມັງກອນ 2020ທີ່ຜ່ານມາ ໄດ້ສ້າງສຳເລັດແລ້ວໃນວັນທີ 2 ກຸມພາ ຊຶ່ງມີຄວາມພ້ອມຮອງຮັບຜູ້ປ່ວຍຕິດເຊື້ອໄວຣັສໂຄໂຣນາສາຍພັນໃໝ່ທີ່ເມືອງ ອູ່ຮັ່ນ ແລະ ໄດ້ມີການສົ່ງມອບເປັນທີ່ຮຽບຮ້ອຍແລ້ວ.
ໃນຕອນເຊົ້າຂອງວັນທີ 2 ກຸມພາ 2020 ໄດ້ມີພິທີການມອບ-ຮັບໂຮງໝໍຫົ່ວເສິນຊານ ໂດຍການເປັນປະທານມອບ-ຮັບໂດຍ ທ່ານ ໂຈວຊຽນວ່າງ ເຈົ້າເມືອງອູ່ຮັ່ນໄດ້ລົງນາມສົ່ງມອບ ແລະ ຮັບໂຮງໝໍກັບ ທ່ານ ໂປ໋ ຈົງປິນ ຮອງຜູ້ບັນຊາການກົມສົ່ງກຳລັງບຳລຸງຮ່ວມ ເພື່ອມອບໂຮງໝໍແຫ່ງນີ້ໃຫ້ກັບໜ່ວຍແພດທະຫານຂອງກຳລັງປົດປ່ອຍປະຊາຊົນຈີນ.
ໂຮງໝໍຈະເປີດຮັບຜູ້ປ່ວຍກຸ່ມທຳອິດໃນວັນທີ 3 ກຸມພານີ້ ໂດຍມີ 1.000 ຕຽງ; ການກໍ່ສ້າງໂຮງໝໍດັ່ງກ່າວໄດ້ໃຊ້ເວລາໃນການປຸກສ້າງພຽງ 10 ວັນ ໃຊ້ກຳລັງແຮງງານຄົນໃນການກໍ່ສ້າງ 7,500 ຄົນ ຮ່ວມກັນສ້າງຕະຫຼອດທັງເວັນທັງຄືນ, ໃຊ້ພື້ນທີ່ປຸກສ້າງ 34,400 ຕາແມັດ, ໃຊ້ງົບປະມານໃນການສ້າງ 1.000 ລ້ານຢວນ.
ສຳນັກຂ່າວຊິນຫົວໄດ້ລາຍງານເມື່ອວັນທີ 2 ກຸມພາວ່າ ເຈົ້າໜ້າທີ່ການແພດຈຳນວນ 1.400 ຄົນ ຊຶ່ງໄດ້ຮັບການອະນຸຍາດຈາກປະທານາທິບໍດີ ສີ ຈິ້ນຜິງ ຈະເຂົ້າໄປປະຕິບັດໜ້າທີ່ໃນໂຮງໝໍພິເສດແຫ່ງນີ້ໃນວັນທີ 3 ກຸມພານີ້.
ຮຽບຮຽງຂ່າວ: ພຸດສະດີ