ໃນວັນທີ 27 ມິຖຸນາ 2019 ທ່ານ ພັນຄໍາ ວິພາວັນ ຮອງປະທານປະເທດແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂ່ຳນັບອຳລາຂອງ ທ່ານ ນາງ Cait Moran ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງອຽກລັງປະຈຳ ສປປ ລາວ ໃນໂອກາດສຳເລັດການປະຕິບັດໜ້າທີ່ການທູດຢູ່ ສປປ ລາວ.
ໂອກາດດັ່ງກ່າວ ທ່ານ ພັນຄຳ ວິພາວັນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ຜົນສຳເລັດໃນການປະຕິບັດໜ້າທີ່ ຂອງ ທ່ານ ນາງ Cait Moran ໃນໄລຍະຜ່ານມາ ຊຶ່ງເປັນປະກອບສ່ວນອັນສໍາຄັນເຂົ້າໃນການຊຸກຍູ້ ສົ່ງເສີມການພົວພັນຮ່ວມມືຮອບດ້ານລະຫວ່າງສອງປະເທດ ລາວ-ອຽກລັງ ໃຫ້ນັບມື້ນັບກວ້າງຂວາງ ໂດຍສະເພາະດ້ານເສດຖະກິດ ການຄ້າ-ການລົງທຶນ ການທ່ອງທ່ຽວ ແລະ ອື່ນໆ ພ້ອມນີ້ ທ່ານຮອງປະທານປະເທດຍັງໄດ້ອວຍພອນໃຫ້ທ່ານທູດຈົ່ງມີສຸຂະພາບແຂງແຮງ ມີພະລານາໄມສົມບູນ ເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສຳເລັດໃນການປະຕິບັດໜ້າທີ່ໃໝ່ຂອງທ່ານ.
ພ້ອມດຽວກັນນີ້ ທ່ານ ນາງ Cait Moran ກໍໄດ້ສະແດງຄວາມຂອບໃຈຕໍ່ທ່ານຮອງປະທານປະເທດທີ່ໄດ້ສະຫຼະເວລາອັນມີຄ່າໃນ ການພົບປະຄັ້ງນີ້ ພ້ອມທັງສະແດງຄວາມຂອບໃຈຢ່າງຈິງໃຈມາຍັງບັນດາການນຳພັກ-ລັດຂອງລາວ ຕະຫຼອດຮອດປະຊາຊົນລາວບັນດາເຜົ່າທີ່ໄດ້ໃຫ້ການຮ່ວມມືເປັນຢ່າງດີ ແລະ ອຳນວຍຄວາມສະດວກທຸກຢ່າງຕະຫຼອດໄລຍະການປະຕິບັດໜ້າທີ່ຂອງຕົນຈົນໄດ້ຮັບຜົນສຳເລັດຢ່າງໜ້າເພິ່ງພໍໃຈ.
ໂດຍ: ສະຫະລັດ ວອນທິວົງໄຊ