ຄະນະຜູ້ແທນຕາງໜ້ານັກຂ່າວຫລາຍກວ່າ 30 ສໍານັກຂ່າວໃນທົ່ວໂລກເຂົ້າຮ່ວມກອງປະຊຸມຄັ້ງປະຖົມມະລຶກການຮ່ວມມືແລກປ່ຽນຂໍ້ມູນ-ຂ່າວສານດ້ານເສດຖະກິດພາຍໃຕ້ຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ຊຶ່ງໄດ້ຈັດຂຶ້ນໃນວັນທີ 27 ມິຖຸນາ 2019 ທີ່ນະຄອນຫຼວງປັກກິ່ງ ສປ ຈີນ ໂດຍມີທ່ານ ຈ້າຍ ມິງຈ່າວ ປະທານສໍານັກຂ່າວຊິນຮວາແຫ່ງ ສປ ຈີນ ມີຜູ້ຕາງໜ້າຈາກຂະແໜງອຸດສະຫະກໍາ ແລະ ການຄ້າຂອງ ສປ ຈີນ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໃນໂອກາດດັ່ງກ່າວ ທ່ານປະທານສໍານັກຂ່າວຊິນຮວາແຫ່ງ ສປ ຈີນ ກ່າວວ່າ ກອງປະຊຸມດັ່ງກ່າວຖືເປັນໂອກາດດີທີ່ຜູ້ແທນຕາງໜ້າສໍານັກຂ່າວຕ່າງໆຈະໄດ້ປຶກສາຫາລືຢ່າງເລິກເຊິ່ງເຖິງຮູບແບບການແລກປ່ຽນຂໍ້ມູນ-ຂ່າວສານດ້ານເສດຖະກິດທີ່ເປັນກາລະໂອກາດ ແລະ ຜົນປະໂຫຍດໃຫ້ແກ່ປະຊາຊົນທາງດ້ານເສດຖະກິດລະຫວ່າງສໍານັກຂ່າວຂອງປະເທດສະມາຊິກທີ່ນອນໃນກອບ “ໜຶ່ງແລວໜຶ່ງເສັ້ນທາງ”.
ການຮ່ວມມືທາງດ້ານການສະໜອງຂໍ້ມູນ-ຂ່າວສານດ້ານເສດຖະກິດ (BREIP) ລິເລິ່ມໂດຍສໍານັກຂ່າວຊິນຮວາ ສ້າງຕັ້ງຂຶ້ນໂດຍການມີສ່ວນຮ່ວມຂອງບັນດາສໍານັກຂ່າວຈາກປະເທດສະມາຊິກທີ່ຕັ້ງໃນໜຶ່ງແລວໜຶ່ງເສັ້ນທາງ ຮູບແບບໃນການຮ່ວມມືໄດ້ຖືກຮັບຮອງໂດຍປະເທດສະມາຊິກເພື່ອສົ່ງເສີມກາລະໂອກາດຂອງການຄ້າ ແລະ ການລົງທຶນ ແລະ ຜົນປະໂຫຍດຂອງຫຼາຍຝ່າຍ ເພື່ອເປັນການອໍານວຍຄວາມສະດວກໃນການແລກປ່ຽນຂໍ້ມູນ-ຂ່າວສານພາຍໃຕ້ BREIP ສໍານັກຂ່າວຊິນຮວາຊຶ່ງເປັນຜູ້ກໍ່ຕັ້ງໂດຍການນໍາໃຊ້ລະບົບເຕັກໂນໂລຊີໃນການສະໜອງຂໍ້ມູນ-ຂ່າວສານ.
ໂດຍ: ສະຫະລັດ ວອນທິວົງໄຊ