ສຳນັກອຸຕຸນິຍົມວິທະຍາຂອງຫຼາຍປະເທດໃນທະວີບເອີຣົບໄດ້ອອກມາປະກາດເຕືອນປະຊາຊົນກ່ຽວກັບຄື້ນຄວາມຮ້ອນທີ່ຄາດວ່າຈະສູງເຖິງ 45 ອົງສາ ຊຶ່ງຈະເຂົ້າປົກຄຸມຢ່າງໜັກໃນບໍລິເວນຝັ່ງຕາເວັນຕົກໃນເຂດເມືອງໃຫຍ່ຈົນເຖິງທ້າຍອາທິດນີ້ ໂດຍສະເພາະປະເທດຝຣັ່ງ ເຢຍລະມັນ ແອັດສະປາຍ ສະວິດເຊີແລນ ແບນຊິກ ເນເທີແລນ ອີຕາລີ ແລະ ອັງກິດ.

ທັງນີ້ ການປົກຄຸມຂອງຄື້ນຄວາມຮ້ອນດັ່ງກ່າວຄາດວ່າຈະຮຸນແຮງທີ່ສຸດໃນຮອບ 16 ປີນັບແຕ່ປີ 2003 ຊຶ່ງຄັ້ງນັ້ນໄດ້ສົ່ງຜົນກະທົບໃຫ້ມີຜູ້ເສຍຊີວິດໃນປະເທດຝຣັ່ງເຖິງ 15.000 ຄົນຊຶ່ງສ່ວນໃຫຍ່ເປັນຄົນອາຍຸສູງ ຢ່າງໃດກໍຕາມ ກໍຍັງບໍ່ເປັນທີ່ແນ່ນອນວ່າຄື້ນຄວາມຮ້ອນທີ່ຈະເຂົ້າປົກຄຸມແຖບເອີຣົບໃນຊ່ວງອາທິດນີ້ຈະສິ້ນສຸດເມື່ອໃດ?.

ຕາມການຄາດຄະເນປະເທດຝຣັ່ງຈະໄດ້ຮັບຜົນກະທົບຈາກຄື້ນຄວາມຮ້ອນຄັ້ງນີ້ຫຼາຍທີ່ສຸດ ໂດຍສະເພາະນະຄອນຫຼວງປາຣີອາດປະສົບກັບອຸນຫະພູມສູງເກືອບ 45 ອົງສາ ຂະນະທີ່ ເມື່ອປີ 2003 ສະຖິຕິສູງສຸດຢູ່ທີ່ 44,1 ອົງສາ ຂະນະທີ່ນະຄອນຫຼວງເບີລິນຂອງເຢຍລະມັນກໍອາດຜະເຊີນກັບອຸນຫະພູມສູງເຖິງ 38 ອົງສາເຊັ່ນດຽວກັບນະຄອນແຟຣງເຟຣີດ ແລະ ຮຳບູຣກ ສ່ວນປະເທດແຖບຕອນກາງຂອງເອີຣົບເຊັ່ນ ລັດບາເດນວືເທມເບີຣກ ແລະ ບາວາເຣຍ ອຸນຫະພູມຈະບໍ່ສູງເທົ່າກັບເຂດທາງເໜືອຂອງເອີຣົບ ຂະນະທີ່ແອັດສະປາຍອາດຜະເຊີນກັບອຸນຫະພູມສູງປະມານ 36 ອົງສາ.

ຮຽບຮຽງ: ສະຫະລັດ ວອນທິວົງໄຊ

ຮູບພາບ: posttoday