ຫຼາຍທ່ານຕ້ອງສົງໃສແນ່ນອນວ່າຈະເກີດຫຍັງຂື້ນພາຍຫຼັງສຳເລັດການປະຊຸມໃນຄັ້ງນີ້?
ກ່ອນກອງປະຊຸມ G20 ຈະໄຂຂື້ນຢ່າງເປັນທາງການມາຮູ້ຈັກກັບ G20 Summit ຫຼື ກອງປະຊຸມກຸ່ມສະມາຊິກ 20
ຊຶ່ງປະກອບດ້ວຍສະມາຊິກຂອງກຸ່ມປະເທດອຸດສາຫະກຳອັນດັບຕົ້ນໆເຊັ່ນ ຍີ່ປຸ່ນ ອາເມຣິກາ ອັງກິດ ເຢຍລະມັນ ຝຣັ່ງ ການາດາ ອີຕາລີ ແລະ ອົດສະຕາລີ.
ພ້ອມດ້ວຍປະເທດເສດຖະກິດເກີດໃໝ່ເຊັ່ນ ລັດເຊຍ ຈີນ ສ.ເກົາຫຼີ ອິນໂດເນເຊຍ ອິນເດຍ ອາຟຣິກາໃຕ້ ອາກຊັງຕິນ ບຣາຊິນ ເມັກຊິໂກ ຕວັກກີ ຊາອຸດິດອາຣັບບີ.
ຈຸດປະສົງຂອງການປະຊຸມແຕ່ລະຄັ້ງແມ່ນຈະມີຫົວຂໍ້ທີ່ແຕກຕ່າງກັນໄປນອກຈາກບັນຫາທາງດ້ານເສດຖະກິດເຊັ່ນ ຄວາມສະຖຽນລະພາບທາງດ້ານເສດຖະກິດ ການພັດທະນາໂຄງສ້າງລະບົບການເງີນລະຫວ່າງປະເທດ ພ້ອມທັງຄວບຄຸມລະບົບການເງີນເພື່ອຫຼຸດຜ່ອນຄວາມສ່ຽງ ພ້ອມນີ້ ກໍຍັງເນັ້ນເຖີງບັນຫາທາງດ້ານສັງຄົມທົ່ວໂລກເຊັ່ນ ການສ້າງວຽກເຮັດງານທຳໃຫ້ປະຊາຊົນ ການແກ້ໄຂບັນຫາການປ່ຽນແປງທາງດ້ານສະພາບດິນຟ້າອາກາດ ແລະ ການພັດທະນາແບບຍືນຍົງ ເຫຼົ່ານີ້ເປັນຕົ້ນ.
G20 ສ້າງຕັ້ງຂື້ນເມື່ອປີ 1999 ໂດຍກຸ່ມລັດຖະມົນຕີວ່າການກະຊວງການເງີນ ແລະ ຜູ້ບໍລິຫານທະນາຄານກາງຈາກບັນດາ 19 ປະເທດເສດຖະກິດຂະໜາດໃຫຍ່ຮ່ວມກັບສະຫະພາບເອີຣົບ ຊຶ່ງມີ GDP ຫຼື ຜະລິດຕະພັນລວມຜົນພາຍໃນປະເທດ ຄິດໄລ່ທັງ ໝົດ 90% ຂອງໂລກ ແລະ ປີນີ້ກອງປະຊຸມ G20 ແມ່ນຈະໄດ້ຈັດຂື້ນທີ່ປະເທດຍີ່ປຸ່ນ ເມືອງໂອຊາກາ ໃນລະຫວ່າງວັນທີ 28-29 ມິຖຸນາ 2019 ທີ່ຈະມາເຖິງນີ້.
ລາຍງານຈາກນະຄອນຫຼວງໂຕກຽວ ປະເທດຍີ່ປຸ່ນ
ຂໍ້ມູນ ແລະ ພາບຈາກ: ກະຊວງການຕ່າງປະເທດຍີ່ປຸ່ນ ແລະ ສະຖານທູດຍີ່ປຸ່ນປະຈຳ ສປປ ລາວ