ເຣເຊີ ແບຣນຊື່ດັງລະດັບໂກລສຳລັບເກມເມີໄດ້ຮ່ວມມືກັບວີຊ່າ ຜູ້ນຳດ້ານການໃຫ້ບໍລິການຊຳລະເງິນດິຈິຕອລລະດັບໂລກປະກາດຄວາມຮ່ວມມືທາງທຸລະກິດຢ່າງເປັນທາງການສຳລັບການປະຕິວັດອຸດສາຫະກຳເກມໃຫ້ຜູ້ໃຊ້ງານ ເຣເຊີ ເພລ ສາມາດເຂົ້າເຖິງເຄືອຂ່າຍຂອງວີຊ່າທົ່ວໂລກໄດ້ຢ່າງເຕັມທີ່.
ປະທານບໍລິຫານວີຊ່າປະຈຳພູມີພາກອາຊີແປຊິຟິກໄດ້ກ່າວວ່າ ມີຄວາມຍິນດີເປັນຢ່າງຍິ່ງທີ່ໄດ້ຮ່ວມມືກັບເຣເຊີໃນການສ້າງສັນນະວັດຕະກຳເພື່ອເພີ່ມທາງເລືອກການຊຳລະເງິນແບບດິຈິຕອລໃຫ້ແກ່ຜູ້ບໍລິໂພກ ທັງນີ້ ການປະກາດຮ່ວມມືດັ່ງກ່າວຖືເປັນການເນັ້ນຢ້ຳຈຸດຢືນຂອງວີຊ່າທີ່ມຸ່ງໝັ້ນໃນການຊ່ວຍພັດທະນາທ່າແຮງດ້ານລະບົບດິຈິຕອລຂອງພູມີພາກອາຊີຕາເວັນອອກສຽງໃຕ້ ນອກ ຈາກນີ້ ວີຊ່າ ແລະ ເຣເຊີ ຟິນເທັກ ຍັງໄດ້ເພີ່ມໂອກາດດ້ານການໃຊ້ຈ່າຍໃຫ້ຄອບຄຸມຫຼາຍກວ່າເກົ່າ ຊຶ່ງບໍ່ພຽງແຕ່ສຳລັບສາວົກເກມເທົ່ານັ້ນ ແຕ່ຍັງຄອບຄຸມເຖິງກຸ່ມຄົນທີ່ຢູ່ນອກລະບົບທະນາຄານ ແລະ ຜູ້ທີ່ຍັງບໍ່ສາມາດເຂົ້າເຖິງລະບົບການຊຳລະເງິນໃນອາຊີຕາ ເວັນອອກສຽງໃຕ້ຈຳນວນຫຼາຍ.
ທັງນີ້ ອາຊີຕາເວັນອອກສຽງໃຕ້ມີປະຊາກອນຈຳນວນຫຼາຍທີ່ບໍ່ມີບັນຊີທະນາຄານ ລວມເຖິງກຸ່ມຄົນທີ່ເຂົ້າບໍ່ເຖິງການຊຳລະເງິນແບບດິຈິຕອລກວ່າ 438 ລ້ານຄົນ ດັ່ງນັ້ນ ການຮ່ວມມືລະຫວ່າງສອງບໍລິສັດໃນຄັ້ງນີ້ຈະສາມາດຊ່ວຍຂະຫຍາຍການໃຫ້ບໍລິການທາງການເງິນໄປຍັງກຸ່ມຄົນດັ່ງກ່າວ ລວມເຖິງກຸ່ມເດັກນ້ອຍ-ເຍົາວະຊົນ ໄວໜຸ່ມສາວ ແລະ ອື່ນໆ ແລະ ໃນອີກບໍ່ເທົ່າໃດເດືອນຂ້າງໜ້າກໍມີແຜນຂະຫຍາຍເພື່ອໃຫ້ຄອບຄຸມໃນຫຼາຍປະເທດທົ່ວໂລກ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: dailynews