ໃນຕອນເຊົ້າວັນທີ 23 ມິຖຸນາ 2019 ຜ່ານມາໄດ້ມີພິທີວາງສີລາລືກໂຄງການກໍ່ສ້າງສູນການຄ້າສາກົນຈຳປາສັກ ທີ່ມີມູນຄ່າກໍ່ສ້າງ 280 ຕື້ກີບ ໂດຍນຳໃຊ້ທຶນພາຍໃນ 100% ຢ່າງເປັນທາງການ ແລະ ອີງຕາມແຜນແມ່ນຈະກໍ່ສ້າງໃຫ້ສຳເລັດພາຍໃນກຳນົດເວ ລາ 3 ປີ ນັບແຕ່ມື້ວາງສີລາລຶກເປັນຕົ້ນໄປ.
ໃຫ້ກຽດເຂົ້າຮ່ວມພິທີວາງສີລາລຶກ ມີທ່ານ ປອ ຄຳພັນ ພົມມະທັດ ຫົວໜ້າຫ້ອງວ່າການສູນກາງພັກ ທ່ານ ປອ ບຸນຖອງ ດີວິໄຊ ເຈົ້າແຂວງໆຈຳປາສັກພ້ອມດ້ວຍຄະນະ ພ້ອມດ້ວຍທ່ານເຈົ້າແຂວງໆສາລະວັນ ເຊກອງ ອັດຕະປື ເຈົ້ານະຄອນປາກເຊ, ການນຳພະແນກການອ້ອມຂ້າງແຂວງ ເມືອງຕະຫຼອດຮອດບັນດາພະນັກງານ ນັກທຸລະກິດຈາກພາກສ່ວນຕ່າງໆ.
ໃນພິທີ ທ່ານ ຄຳໄໝ ຈິນດາວົງ ປະທານບໍລິສັດສູນການຄ້າສາກົນຈຳປາສັກໄດ້ກ່າວວ່າ ສູການຄ້າສາກົນຈຳປາສັກທີ່ຈະກໍ່ສ້າງແມ່ນຕັ້ງຢູ່ຫຼັກກີໂລແມັດທີ 9 ບ້ານໜອງບົວທອງ ເມືອງບາຈຽງຈະເລີນສຸກ ແຂວງຈຳປາສັກ ຕັ້ງຢູ່ແຄມເສັ້ນທາງ 13 ໃຕ້ ປາກເຊ- ເວີນຄາມ ກົງກັນຂ້າມກັບວິທະຍາໄລເຕັກນິກວິຊາຊີບຈຳປາສັກ ໂດຍເນື້ອທີ່ກໍ່ສ້າງທັງໝົດ 13 ເຮັກຕາ ແລະ ມີທຶນຈົດທະບຽນວິສາກະກິດດ້ວຍວົງເງິນ 100 ຕື້ກີບ.
ສູນການຄ້າສາກົນຈຳປາສັກອອກແບບໂດຍບໍລິສັດສະຖາປັດທີ່ປຶກສາສຳຫຼວດອອກແບບຈຳກັດຜູ້ດຽວ ແລະ ໄດ້ຜ່ານການຮອງຮັບມາດຕະຖານຕາມຂໍ້ກໍານົດດ້ານເຕັກນິກ ແລະ ລະບຽບການຕ່າງໆທີ່ກ່ຽວຂ້ອງ.
ສຳລັບການກໍ່ສ້າງຈະມີ 4 ບໍລິສັດຮັບເໝົາຄື ບໍລີສັດປາລະມີກໍ່ສ້າງຈຳກັດຜູ້ດຽວ ບໍລິສັດມະຫາຈະເລີນກໍ່ສ້າງ ບໍລິສັດອານັນກໍ່ສ້າງ ແລະ ບໍລິສັດບິວເທັກກໍ່ສ້າງ ສູນການຄ້າສາກົນຈຳປາສັກ ເມື່ອການກໍ່ສ້າງສໍາເລັດແລ້ວຈະປະກອບມີ 3 ກິດຈະການໃຫຍ່ຄື:
1. ກິດຈະການຂາຍ ໃຫ້ເຊົ່າເຮືອນ ແລະ ຫ້ອງແຖວ.
2. ກິດຈະການໃຫ້ເຊົ່າຫ້ອງຂາຍສິນຄ້າໃນຕະຫຼາດ ແລະ ສູນການຄ້າທີ່ທັນສະໄໝ.
3. ບໍລິການຈຸດພັກສິນຄ້າ ສາງປ່ຽນຖ່າຍສິນຄ້າ ແລະ ບໍລິການຄິວລົດ.
ຈຸດປະສົງໃນການກໍ່ສ້າງແມ່ນເພື່ອຮອງຮັບສະພາບການຂະຫຍາຍຕົວຂອງເສດຖະກິດ ແລະ ສັງຄົມໃນ 4 ແຂວງພາກໃຕ້ເວົ້າລວມ ເວົ້າສະເພາະກໍຄືແຂວງຈຳປາສັກເອງ ເພື່ອເຮັດໃຫ້ມີສູນການຄ້າທີ່ໄດ້ມາດຕະຖານສາກົນໄວ້ບໍລິການລູກຄ້າທັງພາຍໃນ ແລະ ຕ່າງປະເທດ ອີກຢ່າງຫນຶ່ງກໍເພື່ອໃຫ້ກາຍເປັນໃຈກາງທາງດ້ານການຄ້າ ການລົງທຶນ ແລະ ການທ່ອງທ່ຽວ ທັງຊ່ວຍໃຫ້ປະຊາຊົນມີວຽກເຮັດງານທໍາ ແລະ ລາຍຮັບທີ່ແນ່ນອນເພີ່ມຂຶ້ນ.
ໃນພິທີອັນມີຄວາມໝາຍນີ້ ທ່ານ ປອ ຄໍາພັນ ພົມມະທັດ ຫົວໜ້າຫ້ອງວ່າການສູນກາງພັກໄດ້ໃຫ້ກຽດຕີຄ້ອງ 9 ບາດ ຮ່ວມກັບບັນດາທ່ານການນຳແຂວງ 4 ແຂວງພາກໃຕ້ ແລະ ປະທານຄະນະອຳນວຍການບໍລິສັດ ຕັດແຖບຜ້າປ່ອຍປ້າຍ ເລີ່ມການກໍ່ສ້າງສູນການຄ້າສາກົນຈຳປາສັກຢ່າງເປັນທາງການ.
ໂດຍ: ສະຫະລັດ ວອນທິວົງໄຊ