ໃນໄລຍະແຕ່ປີ 2015-2020 ກະຊວງໂຍທາທິການ ແລະ ຂົນສົ່ງ (ຍທຂ) ມີຄວາມຕ້ອງການທຶນຫລາຍກວ່າ 8.000 ຕື້ກີບ
ເພື່ອນຳໃຊ້ເຂົ້າໃນການບູລະນະຮັກສາເສັ້ນທາງຫລວງແຫ່ງຊາດ ແລະ ທາງຫລວງທ້ອງຖິ່ນ, ໃນນັ້ນ ເສັ້ນທາງຫລວງແຫ່ງ
ຊາດຫລາຍກວ່າ 3.000 ຕື້ກີບ ແລະ ເສັ້ນທາງຫລວງທ້ອງຖິ່ນຫລາຍກວ່າ 5.000 ຕື້ກີບ.
ທ່ານ ບຸນຈັນ ສິນທະວົງ ລັດຖະມົນຕີວ່າການກະຊວງໂຍທາທິການ ແລະ ຂົນສົ່ງ ໄດ້ກ່າວໃນອາທິດຜ່ານມານີ້ວ່າ: ການບູລະ
ນະຮັກສາເສັ້ນທາງຫລວງແຫ່ງຊາດ ແລະ ທາງຫລວງທ້ອງຖິ່ນ ແມ່ນມີຄວາມຈຳເປັນທີ່ສຸດ ເພື່ອຮັບປະກັນ ເຮັດໃຫ້ການ
ສັນຈອນໂລ່ງລ່ຽນ ເຊິ່ງຈະສຸມໃສ່ການປົກປັກຮັກສາ ແລະ ຟື້ນຟູບັນດາເສັ້ນທາງຫລັກ ເຊື່ອມຕໍ່ພາຍໃນແຕ່ເໜືອຫາໃຕ້,
ເສັ້ນທາງດ້ານຕາເວັນຕົກລຽບຕາມແຄມແມ່ນ້ຳຂອງ ແລະ ທາງດ້ານຕາເວັນອອກລຽບຕາມສາຍພູຫລວງ, ບັນດາເສັ້ນ
ທາງເຊື່ອມຕໍ່ອະນຸພາກພື້ນ ແຕ່ທິດຕາເວັນອອກຫາທິດຕາເວັນຕົກ ທີ່ເປັນຍຸດທະສາດຮັບໃຊ້ ໃຫ້ແກ່ການພັດທະນາເສດ
ຖະກິດ-ສັງຄົມ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ ໂດຍການຟື້ນຟູຕອນທາງທີ່ເປ່ເພ, ຊີດຢາງ ແລະ ປູ
ຢາງທັບຕອນທາງທີ່ຢູ່ໃນສະພາບດີ ເພື່ອເພີ່ມອາຍຸການນຳໃຊ້ເສັ້ນທາງ. ຜ່ານການເກັບກຳຂໍ້ມູນສະພາບເສັ້ນທາງຕົວຈິງ
ແລະ ຜົນວິເຄາະ ຂອງລະບົບຄຸ້ມຄອງທາງຫລວງແຫ່ງຊາດ ແມ່ນມີຄວາມຕ້ອງການງົບປະມານຫລາຍກວ່າ 3.000 ຕື້ກີບ
ເພື່ອຈັດຕັ້ງປະຕິບັດແຕ່ ປີ 2015-2020 ສະເລ່ຍປະມານ 500 ຕື້ກີບ/ປີ ໃນຄວາມຍາວເສັ້ນທາງຫລວງແຫ່ງຊາດ ທີ່ເກັບກຳ
ແລະ ປ້ອນເຂົ້າລະບົບປະມານ 7.000 ກວ່າກິໂລແມັດ. ສຳລັບການບູລະນະຮັກສາເສັ້ນທາງຫລວງທ້ອງຖິ່ນ ແມ່ນສຸມໃສ່ບັນ
ດາເສັ້ນທາງທີ່ມີຄວາມສຳຄັນຮັບໃຊ້ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານພັດທະນາເສດຖະກິດທ້ອງ
ຖິ່ນ, ເສັ້ນທາງເຂົ້າຫາສະຖານທີ່ທ່ອງທ່ຽວ ແລະ ເຂດທີ່ໝັ້ນການປະຕິວັດ ຕາມເປົ້າໝາຍລົບລ້າງຄວາມທຸກຍາກທົ່ວປະ
ເທດ ເພື່ອຮັບປະກັນການສັນຈອນໃຫ້ໄດ້ທັງສອງລະດູ. ຜ່ານການເກັບກຳຂໍ້ມູນສະພາບເສັ້ນທາງຕົວຈິງ ແລະ ຜົນການວິ
ເຄາະຂອງລະບົບຄຸ້ມຄອງທາງຫລວງທ້ອງຖິ່ນ ແຕ່ປີ 2015-2020 ແມ່ນມີຄວາມຕ້ອງການງົບປະມານຫລາຍກວ່າ 5.000
ຕື້ກີບ, ສະເລ່ຍປະມານ 833 ຕື້ກີບ/ປີ ໃນຄວາມຍາວເສັ້ນທາງ 30.700 ກິໂລແມັດ.
ແຫລ່ງຂ່າວ: ສຳນັກຂ່າວສານປະເທດລາວ