ໃນຕອນເຊົ້າຂອງວັນທີ 21 ມິຖຸນາ 2019 ສ່ວຍສາອາກອນເມືອງຈັດທະບູລີໄດ້ຈັດກິດຈະກຳອອກຮ້ານເສຍຄ່າທາງນອກສະຖານ ທີ່ ຊຶ່ງຈັດຂຶ້ນຢູ່ທີ່ເຂດແຄມຂອງ (ສວນເຈົ້າອານຸວົງ) ບ້ານວັດຈັນ ເມືອງຈັນທະບູລີ ເພື່ອປຸກລະດົມໃຫ້ມວນຊົນອອກມາເສຍຄ່າທາງປະຈຳປີ 2019 ຊຶ່ງຈະໄດ້ຮັບສະຕິກເກີຕິດລົດ.
ໂອກາດດັ່ງກ່າວ ທ່ານ ວິໃນ ທິບດາລາ ຫົວໜ້າສ່ວຍສາອາກອນເມືອງຈັນທະບູລີໄດ້ກ່າວວ່າ ຈຸດປະສົງຂອງການຈັດກິດຈະກຳເສຍຄ່າທາງນອກສະຖານທີ່ກໍເພື່ອບໍລິການປະຊາຊົນແບບເຖິງທີ່ ຊຶ່ງໃນໄລຍະຜ່ານມາເຖິງແມ່ນວ່າຈະມີຈຸດບໍລິການຢູ່ຫ້ອງການສ່ວຍສາອາກອນປະຈຳເມືອງ ແລະ ສາຂາທະນາຄານການຄ້າຕ່າງປະເທດກໍຕາມ ແຕ່ປະຊາຊົນສ່ວນໃຫຍ່ກໍຍັງບໍ່ສາມາດເຂົ້າເຖິງໄດ້ເທົ່າທີ່ຄວນ ທັງນີ້ ອີງຕາມທິດຊີ້ນຳຂອງກະຊວງການເງິນກໍຄືກົມສ່ວຍສາອາກອນຈິ່ງເຫັນດີຈັດກິດຈະກຳເຄື່ອນໄຫວວຽກຈຸດສຸມ ຊຶ່ງມີແຜນລົງປະຕິບັດຢູ່ໃນ 30 ບ້ານທົ່ວເມືອງຈັນທະບູລີ.
ພ້ອມນີ້ ທ່ານຫົວໜ້າກົມສ່ວຍສາອາກອນກໍໄດ້ຝາກເຖິງພໍ່ແມ່ປະຊາຊົນທີ່າໃຊ້ລົດໃຊ້ຖະໜົນທີ່ຍັງບໍ່ທັນໄດ້ເສຍຄ່າທຳນຽມທາງປະຈຳປີ 2019 ກໍຈົ່ງຟ້າວມາລົງທະບຽນເສຍໂດຍດ່ວນ ເນື່ອງຈາກຈະໝົດກຳນົດໃນທ້າຍເດືອນມິຖຸນານີ້ (ວັນທີ 30) ແລະ ໃນເດືອນກໍລະກົດເຈົ້າໜ້າທີ່ສ່ວຍສາອາກອນຈະໄດ້ຮ່ວມກັບເຈົ້າໜ້າທີ່ຕຳຫຼວດຈະລາຈອນເຂັ້ມງວດໃນການຕັ້ງດ່ານກວດແຕ່ຈຸດ ຕ່າງໆຂອງເສັ້ນທາງ.
ໂດຍ: ສະຫະລັດ ວອນທິວົງໄຊ