ລາຍງານປະຈຳປີຂອງຢູເອັນເອຊຊີອາຣລະບຸວ່າ ຈຳນວນຜູ້ລີ້ໄພຊຶ່ງຂຶ້ນທະບຽນກັບໜ່ວຍງານສະສົມໃກ້ເຖິງ 71 ລ້ານຄົນເມື່ອປີຜ່ານມາ ສ່ວນໃຫຍ່ຍັງຄົງເປັນຊາວຊີເຣຍ ແລະ ແຄນາກາ ຊຶ່ງເປັນປະເທດທີ່ຮັບຕັ້ງຖິ່ນຖານຜູ້ລີ້ໄພຫຼາຍທີ່ສຸດ.
ສຳນັກງານຂ້າຫຼວງໃຫຍ່ຜູ້ລີ້ໄພແຫ່ງສະຫະປະຊາຊາດໄດ້ເຜີຍແຜ່ລາຍງານປະຈຳປີກ່ຽວກັບສະຖານະການຜູ້ລີ້ໄພໂລກເນື່ອງໃນໂອ ກາດ “ວັນຜູ້ລີ້ໄພໂລກ” ຊຶ່ງກົງກັບວັນທີ 20 ມິຖຸນາ ໂດຍໃຫ້ຮູ້ວ່າ ຈຳນວນຜູ້ລີ້ໄພທີ່ຂຶ້ນທະບຽນຢ່າງເປັນທາງການກັບຢູເອັນເອຊອາຣຊີຢູ່ທີ່ປະມານ 70,8 ລ້ານຄົນນັບຈົນເຖິງທ້າຍປີ 2018 ຖືເປັນທ່າອຽງທີ່ເພີ່ມຂຶ້ນຢ່າງຕໍ່ເນື່ອງ ແລະ ໜ້າວິຕົກກັງວົນ ຈາກສະຖິຕິ 68,5 ລ້ານຄົນເມື່ອປີ 2017ເພີ່ມຂຶ້ນເຖິງ 65% ຈາກທົດສະວັດທີ່ຜ່ານມາ.
ທັງນີ້ ຈາກສະຖິຕິຜູ້ລີ້ໄພໃນປັດຈຸບັນເກືອບ 71 ລ້ານຄົນພົບວ່າຫຼາຍກວ່າ 41 ລ້ານຄົນ ຫຼື ຄິດເປັນ 3 ໃນ 5 ແມ່ນໄຮ້ທີ່ຢູ່ອາໄສ ແລະ ຕ້ອງລີ້ໄພຢູ່ໃນປະເທດຂອງຕົນເອງ ອັນເນື່ອງມາຈາກພາວະສົງຄາມ ແລະ ພະຍາດລະບາດ ໂດຍປະເທດທີ່ຄອງສະຖິຕິທີ່ປະຊາຊົນຕ້ອງກາຍສະຖານະພາບເປັນຜູ້ລີ້ໄພຫຼາຍທີ່ສຸດໃນຊີເຣຍ ລາຍງານຂອງຢູເອັນເອຊຊີອາຣຍັງລະບຸອີກວ່າ ເຖິງຈະປະເມີນຈຳນວນຜູ້ລີ້ໄພຈາກເວເນຊຸເອລາທີ່ມີຫຼາຍກວ່າ 4 ລ້ານຄົນ ຊຶ່ງເດີນທາງອອກນອກປະເທດຕັ້ງແຕ່ປີ 2016 ເພື່ອຫຼີກເວັ້ນພາະວຫຼົ້ມສະຫຼາຍທາງເສດຖະກິດ ແລະ ສັງຄົມ ແຕ່ມີປະມານ 500.000 ຄົນເທົ່ານັ້ນທີ່ຂຶ້ນທະບຽນຜູ້ລີ້ໄພກັບຢູເອນເອຊຊີອາຣ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AP,REUTERS