ລາຍງານຂ່າວຕ່າງປະເທດເມື່ອວັນທີ 19 ມິຖຸນາຜ່ານມາໃຫ້ຮູ້ວ່າ ທ່ານ ຄິມ ຢອນຊຸລ ລັດຖະມົນຕີກະຊວງການລວມຊາດຂອງ ສ.ເກົາຫຼີ ຊຶ່ງດູແລກິດຈະການລະຫວ່າງສອງປະເທດ (ສ.ເກົາຫຼີ ແລະ ສປ ເກົາຫຼີ) ໄດ້ຖະແຫຼງວ່າ ສ.ເກົາຫຼີ ຈະສົ່ງມອບເຂົ້າສານ ຈຳນວນ 50.000 ໂຕໃຫ້ແກ່ ສປ ເກົາຫຼີ ຜ່ານໂຄງການອາຫານໂລກ.
ທ່ານ ຄິມ ກ່າວວ່າ ການສົ່ງມອບເຂົ້າສານຂອງ ສ.ເກົາຫຼີ ໄປຍັງ ສປ ເກົາຫຼີ ຜ່ານໂຄງການອາຫານໂລກໃນຄັ້ງນີ້ຈະໃຊ້ເວລາປະມານ 2 ເດືອນ ຊຶ່ງນະຄອນຫຼວງໂຊລ ຈະພະຍາຍາມລະດົມເຂົ້າສານໃຫ້ໄດ້ໃນປະລິມານດັ່ງກ່າວໃຫ້ໄວທີ່ສຸດ ການປະກາດສົ່ງມອບເຂົ້າ ສານເກີດຂຶ້ນພາຍຫຼັງທີ່ນະຄອນໂຊລອະນຸມັດການບໍລິຈາກເງິນຈຳນວນ 8 ລ້ານໂດລາໃຫ້ແກ່ໂຄງການອາຫານໂລກ ແລະ ກອງທຶນເດັກແຫ່ງສະຫະປະຊາຊາດເມື່ອຕົ້ນເດືອນຜ່ານມາເພື່ອສົ່ງຄວາມຊ່ວຍເຫຼືອທາງມະນຸດສະທຳດ້ານອາຫານແກ່ເດັກອ່ອນ ແລະ ແມ່ຍິງຖືພາໃນ ສປ ເກົາຫຼີ.
ທັງນີ້ ສ.ເກົາຫຼີ ໄດ້ໃຫ້ຄວາມຊ່ວຍເຫຼືອດ້ານອາຫານແກ່ ສປ ເກົາຫຼີ ຄັ້ງຫຼ້າສຸດເມື່ອປີ 2012 ດ້ວຍການສົ່ງມອບເຂົ້າສານຈຳນວນ 5.000 ໂຕນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: khaosod