ສຳນັກຂ່າວຕ່າງປະເທດລາຍງານ ເມື່ອວັນທີ 9 ຕຸລາ ຜ່ານມານີ້ວ່າ ໄດ້ເກີດເຫດຄົນຮ້າຍແກ່ວງລູກລະເບີດມື 2 ລູກ
ໂຈມຕີເຂດການຄ້າດັງໃນຈາລານ ບູກິດ ບິນຕັງ ນະຄອນຫລວງກົວລາລຳເປີ ໂດຍເຫດລະເບີດເກີດຂຶ້ນໃນຊ່ວງເຊົ້າ
ຂອງວັນພະຫັດ (9 ຕຸລາ) ທີ່ຜ່ານມາ ນອກຮ້ານບັນເທີງແຫ່ງໜຶ່ງ ໂດຍເບື້ອງຕົ້ນ ຕຳຫລວດສັນນິຖານວ່າ ເປັນຝີ
ມືຂອງກຸ່ມແກ໊ງອິດທິພົນຕໍ່ສູ້ກັນໃນເຂດດັ່ງກ່າວ ເຊິ່ງເປັນພື້ນທີ່ຕໍ່ສູ້ຍາດແຍ່ງຂອງກຸ່ມແກ໊ງອິດທິພົນ.
ໂດຍລາຍງານໄດ້ລະບຸວ່າ ໃນຈຳນວນຜູ້ໄດ້ຮັບບາດເຈັບ 10 ຄົນ ແມ່ນປະກອບດ້ວຍນັກທ່ອງທ່ຽວ 4 ຄົນ ໂດຍມີຄົນ
ໄທ 1 ຄົນ ຈີນ 2 ຄົນ ສິງກະໂປ 2 ຄົນ ໂດຍບາງຄົນຢູ່ໃນຮ້ານບັນເທີງດ່ັງກ່າວ ເຊິ່ງຕົກເປັນເປົ້າການໂຈມຕີຂອງຄົນ
ຮ້າຍ. ຈາກການສອບສວນເບື້ອງຕົ້ນ ລະເບີດດັ່ງກ່າວ ແມ່ນເປັນລະເບີດຕະປູ ເຮັດໃຫ້ເກີດມີຜູ້ໄດ້ຮັບບາດເຈັບ
ຫລາຍລາຍ, ແຮງລະເບີດຍັງໄດ້ເຮັດໃຫ້ລົດຕູ້ຄັນໜຶ່ງເສຍຫາຍຢ່າງໜັກ.
ທັງນີ້ ເຫດລະເບີດທຳນອງນີ້ ບໍ່ຄ່ອຍເກີດຂຶ້ນໃນມາເລເຊຍ ແຕ່ຫລາຍຝ່າຍກໍໄດ້ວິຕົກກັງວົນຕໍ່ໄພຄຸກຄາມຂອງ
ກຸ່ມຕິດອາວຸດໃນມາເລເຊຍ ຫລັງຈາກທີ່ທາງການມາເລເຊຍຍອມຮັບວ່າ ມີຊາວມາເລເຊຍຫລາຍຄົນ ໄດ້ເຂົ້າຮ່ວມ
ເຮັດສົງຄາມກັບກຸ່ມ IS ໃນຊີເຣຍ ແລະ ອີຣັກ ໂດຍກ່ອນໜ້ານີ້ ເມື່ອເດືອນສິງຫາທີ່ຜ່ານມາ ຕຳຫລວດມາເລເຊຍ
ກໍໄດ້ຈັບກຸມຜຸ້ຕ້ອງສົງໄສ 19 ຄົນ ທີ່ເຊື່ອວ່າໄດ້ຮັບອິດທິພົນຈາກກຸ່ມ IS ທີ່ວາງແຜນຈະກໍ່ເຫດວິນາດສະກຳວາງ
ລະເບີດໃນມາເລເຊຍ.