ສຳນັກຂ່າວຕ່າງປະເທດລາຍງານເມື່ອວັນທີ 18 ມິຖຸນາຜ່ານມາວ່າ ຫຼາຍເຂດໃນປະເທດອິນເດຍພວມຜະເຊີນກັບວິກິດຂາດແຄນນ້ຳກະທັນຫັນໃນເມືອງເຈນໄນ ເມືອງຫຼວງຂອງລັດລະມິນລະນາທູ ທາງໃຕ້ສຸດຂອງປະເທດພາຍຫຼັງທີ່ອ່າງເກັບນ້ຳຫຼັກ 4 ແຫ່ງຂອງເມືອງແຫ້ງສົ່ງຜົນໃຫ້ທາງການຕ້ອງຊອກຫາວິທີທາງແກ້ຢ່າງຮີບດ່ວນ.
ເມືອງເຈນໄນເປັນເມືອງຂະໜາດນ້ອຍອັນດັບ 6 ຂອງອິນເດຍ ປັດຈຸບັນກຳລັງຜະເຊີນກັບພາວະຂາດແຄນນ້ຳຢ່າງຮຸນແຮງຊຶ່ງແກ່ຍາວເປັນເວລາຫຼາຍອາທິດແລ້ວ ສົ່ງຜົນກະທົບຢ່າງໜັກແກ່ປະຊາຊົນ ລວມເຖິງໂຮງແຮມ ແລະ ຮ້ານອາຫານກໍໄດ້ປິດໃຫ້ບໍລິການຊົ່ວຄາວ ລວມທັງລົດໄຟຟ້າໃຕ້ດິນກໍປິດເຄື່ອງປັບອາກາດພາຍໃນສະຖານີອີກດ້ວຍ.
ນອກຈາກນີ້ ບັນດາບໍລິສັດກໍໄດ້ໃຫ້ພະນັກງານເຮັດວຽກມາຈາກບ້ານເພື່ອເປັນການປະຢັດນ້ຳແຕ່ກໍຍັງບໍ່ໄດ້ຜົນ ທັງນີ້ ວິກິດຂາດແຄນນ້ຳສົ່ງຜົນໃຫ້ທະເລສາບຫຼາຍສາຍ ແລະ ອ່າງເກັບນ້ຳແຫ້ງ ຊາວບ້ານຕ້ອງຕໍ່ແຖວຫຼາຍຊົ່ວໂມງເພື່ອລໍຖ້າຮັບນ້ຳຈາກລົດແຈກນ້ຳຂອງສຳນັກງານການປະປາທ້ອງຖິ່ນ ຂະນະທີ່ຊາວບ້ານບາງສ່ວນກໍເກີດຜິດຖຽງກັນເລັກໜ້ອຍກໍລະນີຍາດນ້ຳ.
ຂະນະທີ່ທາງການກໍພະຍາຍາມຊອກຫາແຫຼ່ງນ້ຳສຳຮອງເພື່ອບັນເທົາທຸກໃຫ້ປະຊາຊົນ ສ່ວນສຳນັກງານການປະປາໃນເມືອງເຈນໄນໄດ້ເລີ່ມລະບຸຈຸດ ແລະ ສະກັດນ້ຳຈາກເໝືອງຫີນ ແຕ່ບັນຫາໃຫຍ່ກໍຄືລະດັບນ້ຳບາດານຫຼຸດຕ່ຳລົງ ທາງດຽວທີ່ຈະເຮັດໃຫ້ບັນຫາເຫຼົ່ານີ້ດີຂຶ້ນກໍຄື ການປັບໃຫ້ລະດັບນ້ຳບາດານສູງຂຶ້ນ ຊຶ່ງວິກິດການແບບນີ້ເກີດຂຶ້ນຊ້ຳແລ້ວຊ້ຳອີກ ແລະ ນ້ຳບາດານຖືເປັນທາງລອດທາງດຽວຂອງພວກເຮົາ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: GETTY IMAGES