ລາຍງານຂ່າວຕ່າງປະເທດເມື່ອວັນທີ 17 ມິຖຸນາຜ່ານມາເປີດເຜີຍເລື່ອງລາວຂອງນັກລ່າຕ່າງສາຍພັນລະຫວ່າງ ແຂ້ ແລະ ງູ ທີ່ຕໍ່ສູ້ເພື່ອເອົາໂຕລອດ ໂດຍຝ່າຍໃດທີ່ແພ້ກໍຕ້ອງຕົກເປັນເຫຍື່ອຂອງຜູ້ຊະນະ.
ທັງນີ້ ໄດ້ມີການເຜີຍແຜ່ຮູບພາບຂອງງູເຫຼືອມໝາກກອກ ຫຼື Olive Python ຊຶ່ງເປັນງູທີ່ມີຂະໜາດໃຫຍ່ເປັນອັນດັບ 2 ຂອງປະເທດອົສຕຣາລີທີ່ກຳລັງຮັດ ແລະ ກຶນກິນແຂ້ທີ່ມີຂະໜາດໃຫຍ່ກວ່າໂຕຂອງມັນຢ່າງສະບາຍ ພາບດັ່ງກ່າວຖືກບັນທຶກໄດ້ຈາກບໍລິເວນໜອງນ້ຳແຫ່ງໜຶ່ງໃນລັດຄວີນແລນ ປະເທດອົສຕຣາລີ ໂດຍນັກພາຍເຮືອຊື່ວ່າ ມາຣຕິນ ມຸລເລີຣ ທີ່ພາຍເຮືອຜ່ານໄປເຫັນເຫດດັ່ງກ່າວ.
ຂະນະທີ່ ມິເຊລ ໂຈນສ ເຈົ້າຂອງສູນຊ່ວຍເຫຼືອສັດປ່າ GG Wildlife Rescue Inc ໄດ້ເປີດເຜີຍວ່າ ຕົນເອງກໍລ້ຽງງູເຫຼືອຊະນິດນີ້ 2 ໂຕ ແລະ ເຮັດໃຫ້ຮູ້ວ່າເປັນເລື່ອງທຳມະດາທີ່ສັດຊະນິດນີ້ຈະກິນຫຍັງກໍໄດ້ທີ່ສາມາດເອົາເຂົ້າປາກຂອງມັນໄດ້ ບໍ່ວ່າຈະເປັນສັດນ້ອຍ ຫຼື ສັດທີ່ມີຂະໜາດໃຫຍ່ກວ່າໂຕຂອງມັນກໍຕາມ.
ຮຽບຮຽງ: ສະຫະລັດ ວອນທິວໄຊ