ອົງການອະນາໄມໂລກມີມະຕິທີ່ຍັງບໍ່ປະກາດໃຫ້ສະຖານະການແຜ່ລະບາດຂອງເຊື້ອໄວຣັສອີໂບລາໃນປະເທດດີອາຣຄອງໂກ ຊຶ່ງຂ້າຊີ ວິດປະຊາຊົນຫຼາຍກວ່າ 1.400 ລາຍນັບແຕ່ກາງປີ 2018 ແລະ ພວມແຜ່ຂະຫຍາຍໄປຍັງພົມແດນຢູກັນດາ ຊຶ່ງຖືເປັນພາວະສຸກເສີນດ້ານສາທາລະນະສຸກລະຫວ່າງປະເທດ.
ລາຍງານຂ່າວຕ່າງປະເທດເມື່ອວັນທີ 15 ມິຖຸນາຈາກນະຄອນເຈນນີວາ ປະເທດສະວິດເຊີແລນໃຫ້ຮູ້ວ່າ ຜູ້ອຳນວຍການອົງການອະນາໄມໂລກກ່າວລະຫວ່າງລົງພື້ນທີ່ສາທາລະນະລັດ ປະຊາທິປະໄຕ ດີອາຣຄອງໂກວ່າ ໄດ້ຮັບແຈ້ງຈາກທີ່ປະຊຸມວາລະສຸກເສີນຂອງ WHO ໂດຍມີມະຕິຍັງບໍ່ປະກາດໃຫ້ສະຖານະການແຜ່ລະບາດຂອງເຊື້ອໄວຣັສອີໂບລາເປັນພາວະສຸກເສີນດ້ານສາທາລະນະສຸກລະຫວ່າງປະເທດ.
ຢ່າງໃດກໍຕາມ ຜູ້ຊ່ຽວຊານກໍໄດ້ອອກມາຢືນຢັນວ່າ ການທີ່ບໍ່ໄດ້ປະກາດໃຫ້ສະຖານະການສຸກເສີນກໍບໍ່ໄດ້ໝາຍຄວາມວ່າ WHO ຈະນິ້ງເສີຍຕໍ່ວິກິດຄັ້ງນີ້ ແຕ່ກົງກັນຂ້າມຍິ່ງເພີ່ມຄວາມຊ່ວຍເຫຼືອໃຫ້ແກ່ທຸກປະເທດທີ່ກຳລັງໄດ້ຮັບຜົນກະທົບ ທັງນີ້ ຢູກັນດາ ຊຶ່ງມີພົມແດນທາງຕາວັນຕົກຕິດກັບດີອາຣຄອງໂກ ພົບມີຜູ້ເສຍຊີວິດແລ້ວຈາກເຊື້ອໄວຣັສອີໂບລາເມື່ອ ບໍ່ດົນມານີ້ຊຶ່ງເປັນເດັກຊາຍອາຍຸ 5 ປີ ຫຼັງຈາກນັ້ນພຽງວັນດຽວແມ່ເຖົ້າຂອງເດັກຄົນດັ່ງ ກ່າວກໍເສຍຊີວິດດ້ວຍພະຍາດດຽວກັນ ຂະນະທີ່ສະມາຊິກໃນຄອບຄົວຊຶ່ງລວມເຖິງເດັກຊາຍອາາຍຸ 3 ປີທີ່ແພດຢືນຢັນວ່າຕິດເຊື້ອ ແລະ ຜູ້ຕ້ອງສົງໃສໃກ້ຊິດກັບຄອບຄົວນີ້ຊຶ່ງລີ້ ໄພຂ້າມພົມແດນມາຈາກດີອາຣຄອງໂກເກືອບ 100 ຄົນຕ້ອງຖືກກັບບໍລິເວນ.
ສຳລັບວິກິດການແຜ່ລະບາດຂອງອີໂບລາໃນດີອາຣຄອງໂກຄັ້ງນີ້ເປັນການແຜ່ລະບາດຄັ້ງທີ 2 ຕໍ່ຈາກການແຜ່ລະບາດລະຫວ່າງເດືອນພຶດສະພາຫາເດືອນກໍລະກົດປີ 2018 ແຕ່ຄັ້ງນີ້ມີຄວາມຮຸນແຮງກວ່າ ຊຶ່ງມີຜູ້ເສຍຊີວິດແລ້ວເຖິງ 1.400 ລາຍ ແລະ ມີຜູ້ປ່ວຍສະສົມອີກຫຼາຍກວ່າ 2.000 ຄົນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: dailynews