ລາຍການ Discoveries in Life ຂອງສະຖານີໂທລະພາບ KBS ໃນປະເທດ ສ.ເກົາຫຼີ ອ້າງຂໍ້ມູນຈາກລາຍງານຜົນວິໄຈທີ່ແນະນຳໃຫ້ແມ່ຍິງແນມເບິ່ງໜ້າຜູ້ຊາຍ (ໜ້າຫຼໍ່) ຊຶ່ງຈະຊ່ວຍເພີ່ມຄວາມຈື່ຈຳ ທັງຊ່ວຍເພີ່ມປະສິດທິພາບຂອງການຮ່ຳຮຽນດີຂຶ້ນ.
ງານວິໄຈດັ່ງກ່າວແມ່ນໄດ້ຂໍຄວາມຮ່ວມມືໃຫ້ແມ່ຍິງໄວກາງຄົນຈື່ຈຳຊື່ຕົວລະຄອນໃຫ້ໄດ້ຫຼາຍທີ່ສຸດໃນໄລຍະເວລາ 1 ນາທີ ຈາກນັ້ນນັກວິໄຈຈະຖາມຜູ້ເຂົ້າຮ່ວມໃຫ້ຈື່ຈຳຊື່ຕົວລະຄອນພ້ອມກັບເບິ່ງຮູບຄົນໜ້າຕາດີ ຜົນປາກົດວ່າໄດ້ຄຳຕອບທີ່ຖືກຕ້ອງເຖິງ 2 ໃນ 14 ນອກຈາກນີ້ ຫົວໜ້າສູນວິໄຈດ້ານສະໝອງຍັງກໍໄດ້ກ່າວຕື່ມວ່າ ຈາກການທົດລອງຍັງຢືນຢັນໄດ້ວ່າສະໝອງບໍລິເວນຂະໝັບຊຶ່ງມີສ່ວນກ່ຽວຂ້ອງກັບຄວາມຈື່ຈຳມີປະຕິກິລິຍາຈາກການທົດລອງໃນລັກສະນະນີ້ຫຼາຍທີ່ສຸດ.
ທັງນີ້ KBS ຍັງໄດ້ສຳພາດພະນັກງານໃນພະແນກສຸຂະພາບຈິດຂອງມະຫາວິທະຍາໄລຊອນມຸນ ຊຶ່ງນາງກ່າວວ່າການທີ່ໄດ້ແນມເບິ່ງຮູບພາບຂອງຜູ້ຊາຍໜ້າຕາດີຈະຊ່ວຍໃຫ້ອາລົມດີ ແລະ ເມື່ອອາລົມດີກໍຈະສົ່ງຜົນດ້ານບວກຕໍ່ສະໝອງ.
ຢ່າງໃດກໍຕາມ ຈິດຕະແພດກໍໄດ້ກ່າວຢ້ຳວ່າ ເມື່ອຜູ້ຊາຍເບິ່ງພາບແມ່ຍິງງາມຜັດບໍ່ມີຜົນດ້ານການກະຕຸ້ນຄວາມຊົງຈຳຂອງຜູ້ຊາຍໃຫ້ດີຂຶ້ນ ກົງກັນຂ້າມຮູບແມ່ຍິງງາມຜັດໄປແຊກແຊງການເຮັດວຽກຂອງຄວາມຊົງຈຳ ເນື່ອງຈາກຮູບແບບການຈື່ຈຳຂອງສະໝອງຕໍ່ວັດຖຸທີ່ແຕກຕ່າງກັນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: posttoday.com