ສຳນັກຂ່າວຕ່າງປະເທດລາຍງານເມື່ອວັນທີ 15 ມິຖຸນາຜ່ານມາວ່າ ເກີດຄະດີສະເທືອນຂວັນໃນປະເທດບຣາຊິນ ເມື່ອແມ່ແທ້ໆໃຊ້ມີດກະໜ່ຳແທງ ແລະ ປາດຄໍລູກຊາຍແທ້ໆໄວ 9 ປີຂອງນາງອັນເນື່ອງມາຈາກລູກຊາຍຢາກກາຍເປັນຍິງ.
ນາງ ໂຣຊານາ ກັນດິໂດ ອາຍຸ 27 ປີ (ແມ່) ແລະ ນາງສາວ ຄາຊີລາ ເພສໂຊອາ ອາຍຸ 28 ປີ (ຍິງຮັກຍິງ) ຮັບສາລະພາບວ່າໄດ້ລົງມືກໍ່ເຫດສະເທືອນຂວັນທີ່ເມືອງຊາມຳໄບອາ ຫ່າງຈາກນະຄອນບຣາຊິເລຍນະຄອນຫຼວງຂອງບຣາຊິນປະມານ 32 ກີໂລແມັດ ທັງນີ້ ທັງສອງໄດ້ເລົ່າລາຍລະອຽດໃຫ້ເຈົ້າໜ້າທີ່ສືບສວນ-ສອບສວນຟັງວ່າ ນາງ ກັນດິໂດ ໄດ້ໃຊ້ມີດແທງ ທ້າວ ຣູອັນ (ລູກຊາຍ) 12 ຄັ້ງ ແລ້ວໃຊ້ມີດປາດຄໍລູກຊາຍ ຫຼັງຈາກນັ້ນທັງສອງກະພະຍາຍາມຂວັດໜ່ວຍຕາຂອງເດັກຊາຍເພື່ອປ້ອງກັນບໍ່ໃຫ້ຄົນອື່ນຈື່ໜ້າຂອງເດັກ ແລະ ໄດ້ນຳເອົາສິ້ນສ່ວນຂອງເດັກໄປເຜົາແຕ່ບໍ່ສຳເລັດ ຈຶ່ງໄດ້ນຳເອົາສົບຍັດໃສ່ກະເປົ໋າແລ້ວນຳໄປຖິ້ມໄວ້ໃນທໍ່ລະບາຍນ້ຳ.
ຂະນະທີ່ຜູ້ຕ້ອງຫາທັງສອງໄດ້ກ່າວອີກວ່າ ໄດ້ລົງມືກໍ່ເຫດດັ່ງກ່າວເນື່ອງຈາກວ່າລູກຊາຍຂອງຕົນຕ້ອງການເປັນແມ່ຍິງ ລາຍງານຍັງລະບຸອີກວ່າ ອາຊະຍາກຳແສນທໍລະມານດັ່ງກ່າວສ້າງຄວາມສະເທືອນໃຈໃຫ້ແກ່ຜູ້ເປັນພໍ່ ແລະ ຜູ້ທີ່ໄດ້ພົບເຫັນ ລວມເຖິງເຈົ້າໜ້າທີ່ສືບສວນ-ສອບສວນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: khaosod.co.th