ສຳນັກຂ່າວຕ່າງປະເທດລາຍງານຈາກນະຄອນຫຼວງຮ່າໂນ່ຍ ສສ ຫວຽດນາມເມື່ອວັນທີ 16 ມິຖຸນາ 2019 ວ່າ ສະພາແຫ່ງຊາດຫວຽດນາມມີມະຕິຕົກລົງໃນການປະຊຸມເມື່ອວັນສຸກທີ່ຜ່ານມາ ໂດຍລົງມະຕິ 450 ສຽງຈາກ 480 ສຽງ ເຫັນດີຜ່ານຮ່າງກົດ ໝາຍວ່າດ້ວນການປ້ອງກັນ ແລະ ຄວບຄຸມອັນຕະລາຍ ແລະ ຜົນກະທົບທາງລົບຈາກການບໍລິໂພກເຄື່ອງດື່ມແອລກໍຮໍ ຊຶ່ງຫາກວດພົບຜູ້ຂັບຂີ່ພາຫະນະມີປະລິມານແອລກໍຮໍໃນຮ່າງກາຍບໍ່ວ່າຈະມີປະລິມານເທົ່າໃດກໍຕາມໃບຂັບຂີ່ຂອງຜູ້ນັ້ນຈະຖືກຢຶດ ແລະ ລະງັບການນຳໃຊ້ທັນທີ ທັງນີ້ ກົດໝາຍດັ່ງກ່າວຈະມີຜົນບັງຄັບໃຊ້ຢ່າງເປັນທາງການຕັ້ງແຕ່ປີ 2020 ເປັນຕົ້ນໄປ.
ທັງນີ້ ເມື່ອອາທິດທີ່ຜ່ານມາສະມາຊິກສະພາມີການສະເໜີໃຫ້ພິຈາລະນາຫ້າມຈຳໜ່າຍເຄື່ອງດື່ມແອລກໍຮໍໃນລະຫວ່າງເວລາ 22:00-08:00 ໂມງ ແຕ່ປະຊາົນສ່ວນໃຫຍ່ຄັດຄ້ານເນື່ອງຈາກອາດສົ່ງຜົນກະທົບຕໍ່ອຸດສາຫະກຳການທ່ອງທ່ຽວ ແລະ ການຜະລິດເຄື່ອງດື່ມພາຍໃນປະເທດ ຢ່າງໃດກໍຕາມ ສະພາແຫ່ງຊາດຫວຽດນາມໄດ້ເຫັນດີໃຫ້ເພີ່ມຄວາມເຂັ້ມງວດຕໍ່ບຸກຄົນທີ່ດື່ມ ແອລກໍຮໍລະຫວ່າງຂັບຂີ່ພາຫະນະເພື່ອຫຼຸດອັດຕາການເກີດອຸບັດ “ເມົາແລ້ວຂັບ”.
ຮຽບຮຽງ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: dailynews