ທ້າວ ປີຊູ ຄີຊໍຣ ຊັລລາ ນັກທຸລະກິດຊາວອິນເດຍ ຊຶ່ງຖືກສານອິນເດຍຕັດສິນໃຫ້ຕິດຄຸກຕະຫຼອດຊີວິດ ພ້ອມປັບໄໝເງິນ 50 ລ້ານຣູປີ ຂໍ້ຫາເປັນໄພຄຸກຄາມຕໍ່ຄວາມປອດໄພຂອງຜູ້ໂດຍສານ ແລະ ລູກເຮືອເທິງເຮືອບິນ ທັງນີ້ ສານໄດ້ຕັດສິນໃຫ້ນຳເງິນຄ່າປັບມາຈ່າຍເປັນຄ່າຊົດເຊີຍ (ຄ່າຕົກໃຈ) ໃຫ້ນັກບິນຄົນລະ 100.000 ຣູປີ ແລະ ຜູ້ໂດຍສານຄົນລະ 25.000 ຣູປີ.
ເຫດການດັ່ງກ່າວເກີດຂຶ້ນເມື່ອປີ 2017 ເທິງເຮືອບິນຂອງສາຍການບິນ ເຈັດ ແອຣເວ ຊຶ່ງປັດຈຸບັນໄດ້ປິດກິດຈະການໄປແລ້ວ ເມື່ອເຈົ້າໜ້າທີ່ສືບສວນ-ສອບສວນແຫ່ຊາດຂອງອິນເດຍໄດ້ຖະແຫຼງຕໍ່ສານວ່າ ຜູ້ໂດຍສານຄົນໜຶ່ງມີເຈ້ຍທີ່ຂຽນຂໍ້ຄວາມນາບຂູ່ໃນຫ້ອງນ້ຳຊັ້ນບ່ອນນັ່ງສຳລັບນັກທຸລະກິດທີ່ມີເນື້ອໃນວ່າ “ມີຄົນຮ້າຍປຸ້ນຈີ້ເຮືອບິນພ້ອມກັບລະເບີດຢູ່ເທິງສາຍການບິນນີ້” ເຮັດໃຫ້ນັກບິນຕ້ອງນຳເຮືອບິນລົງຈອດແບບສຸກເສີນ.
ຕໍ່ມາພະນັກງານສືບສວນ-ສອບສວນສາມາດຄົ້ນເຫັນເຈ້ຍໃບຂໍ້ຄວາມດັ່ງກ່າວ ຊຶ່ງເປັນຂອງ ທ້າວ ຊັລລາ ພ້ອມຕັ້ງຂໍ້ຫາພະຍາ ຍາມຍຶດການຄວບຄຸມເຮືອບິນ ແລະ ສ້າງເລື່ອງຂີ້ຕົວະ ດັ່ງກ່າວ ຄະດີດັ່ງກ່າວຖືເປັນຄະດີທຳອິດພາຍໃຕ້ກົດໝາຍຕໍ່ຕ້ານການປຸ້ນຈີ້ເຮືອບິນສະບັບໃໝ່ທີ່ມີຜົນບັງຄັບໃຊ້ຕັ້ງແຕ່ປີ 2016 ຊຶ່ງມີຄວາມຮັດກຸມກວ່າກົດໝາຍສະບັບເກົ່າ ແລະ ຂະຫຍາຍຂອບເຂດຂອງການປຸ້ນຈີ້ເຮືອບິນໄປເຖິງການພະຍາຍາມ ແລະ ການນາບຂູ່ເຮືອບິນ ພ້ອມນີ້ ກໍໄດ້ເພີ່ມໂທດປະຫານຊີວິດ ແລະ ໂທດອື່ນໆຂຶ້ນຕື່ມ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: khaosod.co.th