ໃນວັນທີ 14 ມິຖຸນາ 2016 ທີ່ສູນການຄ້າລາວ-ໄອເຕັກ (ຕຶກໃໝ່) ໄດ້ຈັດກິດຈະກຳສະເຫຼີມສະຫຼອງວັນບໍລິຈາກເລືອດໂລກ (14 ມິຖຸນາ) ໃນຫົວຂໍ້ “ເລືອດປອດໄພ-ເພື່ອທຸກຄົນ” ໂດຍການເຂົ້າຮ່ວມຂອງ ທ່ານ ດຣ ສິງ ເມໂນລາດ ຮອງປະທານອົງການກາແດງລາວ ມີບັນດາຕາງໜ້າຈາກກະຊວງ ອົງກອນ ຫ້າງຮ້ານ ບໍລິສັດ ແລະ ມວນຊົນເຂົ້າຮ່ວມຢ່າງຫຼວງຫຼາຍ.
ກິດຈະກຳດັ່ງກ່າວແມ່ນໄດ້ຈັດມາແລ້ວໃນວັນທີ 6 ມິຖຸນາ 2016 ທີ່ແຂວງຊຽງຂວາງ ວັນທີ 12 ມິຖຸນາທີ່ແຂວງບໍລິຄຳໄຊ ແລະ ໃນວັນທີ 19 ມິຖຸນາແມ່ນຈະຈັດຢູ່ທີ່ແຂວງຈຳປາສັກ ສະຫວັນນະເຂດ ແລະ ອີກຫຼາຍແຂວງທົ່ວປະເທດ.
ທັງນີ້ ວັນທີ 14 ມິຖຸນາຂອງທຸກປີຖືເປັນວັນທີ່ກຳນົດການສະເຫຼີມສະຫຼອງວັນບໍລິຈາກເລືອດໂລກ (World Blood Donor Day) ຊຶ່ງບັນດາປະເທດທົ່ວໂລກກໍໄດ້ຈັດກິດຈະກຳດັ່ງກ່າວເຊັ່ນກັນ ຈຸດປະສົງກໍເພື່ອເປັນການສະແດງຄວາມຂອບໃຈຕໍ່ຜູ້ບໍລິຈາກເລືອດທີ່ເຂົາເຈົ້າໄດ້ມອບຂອງຂວັນທີ່ມີຄ່າທີ່ສຸດນັ້ນກໍຄື ການບໍລິຈາກເລືອດດ້ວຍຄວາມສະໝັກໃຈ ເພື່ອຊ່ວຍເຫຼືອຄົນເຈັບທີ່ລໍຖ້າຄວາມຊ່ວຍເຫຼືອ.
ໂດຍຄາດໝາຍຂອງກິດຈະກຳດັ່ງກ່າວຄາດວ່າຈະມີຜູ້ເຂົ້າຮ່ວມບໍລິຈາກໂດຍສະໝັກໃຈຫຼາຍກວ່າ 1.000 ຄົນ ແລະ ຄາດວ່າຈະສາມາດຮັບບໍລິຈາກເລືອດໄດ້ຢ່າງຕ່ຳ 500 ຖົງ.
ໂດຍ: ສະຫະລັດ ວອນທິວົງໄຊ