ຜູ້ບໍລິຫານອາລີບາບາ (ແຈັກ ໝ່າ) ກ່າວເຖິງໂອກາດການເຂົ້າເຖິງອິນເຕີເນັດເປັນສິ່ງສຳຄັນທີ່ສຸດໃນຍຸກປັດຈຸບັນ ເມື່ອທຽບກັບການເຂົ້າເຖິງໄຟຟ້າໃນຊ່ວງສະຕະວັດທີ່ຜ່ານມາ.
ແຈັກ ໝ່າ ຜູ້ບໍລິຫານອາລີບາບາ ອີຄອມເມີຣສຊື່ດັງໃນ ສປ ຈີນ ໄດ້ກ່າວໃນລາຍການໂທລະພາບຂອງອົງການສະຫະປະຊາຊາດໃນນະຄອນນິວຢອກວ່າ “ທຸກມື້ນີ້ຫາກເຮົາບໍ່ໄດ້ເຊື່ອມກັບປະເທດໃດ ຫຼື ຫາກທ່ານບໍ່ໃຫ້ປະຊາຊົນຂອງທ່ານເຂົ້າເຖິງອິນເຕີເນັດກໍຖືເປັນສິ່ງທີ່ໂຫດຮ້າຍຍິ່ງກວ່າສະຕະວັດທີ່ຜ່ານມາ ເມື່ອທຽບກັບການບໍ່ສາມາດເຂົ້າເຖິງໄຟຟ້າ”.
ການເຂົ້າເຖິງອິນເຕີເນັດກຳລັງຈະປ່ຽນແປງສິ່ງຕ່າງໆຢ່າງຫຼວງຫຼາຍ ດັ່ງນັ້ນ ຈຶ່ງບໍ່ຄວນປ່ອຍໃຫ້ຄົນສ່ວນຫຼາຍຈົມຢູ່ໃນສະຕະວັດທີ່ຜ່ານມາ (ຊຶ່ງບໍ່ສາມາດເຂົ້າເຖິງອິນເຕີເນັດ) ທັງນີ້ ການອະພິບາຍໃນຄັ້ງນີ້ເປັນສ່ວນໜຶ່ງຂອງຫົວຂໍ້ “ຍຸກຂອງການເພິ່ງພາຊຶ່ງກັນ ແລະ ກັນຂອງລະບົບດິຈິຕອລ” ຊຶ່ງເປັນວາລະການເຮັດວຽກຂອງ UN ໃນປະເດັນຄວາມຮ່ວມມືດ້ານດິຈິຕອລ.
ຂະນະທີ່ລາຍງານຂອງ UN ກໍໄດ້ລະບຸວ່າ ປະຊາກອນໂລກຫຼາຍກວ່າເຄິ່ງໜຶ່ງຍັງບໍ່ສາມາດເຂົ້າເຖິງລະບົບອິນເຕີເນັດ ຫຼື ບໍ່ມີຄວາມສາມາດພຽງພໍທີ່ຈະເຂົ້າເຖິງອິນເຕີເນັດໄດ້ຢ່າງມີປະສິດທິພາບ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: posttoday.com