ລາຍງານສະຖານະການ ການແຜ່ລະບາດຂອງພະຍາດໃນລັດພິຫານ ທາງຕາເວັນອອກສຽງເໜືອຂອງປະເທດອິນເດຍ ພາຍຫຼັງພົບເດັກປ່ວຍເປັນພະຍາດສະໝອງອັກເສບກະທັນຫັນ (AES) ໃນນັ້ນ ເສຍຊີວິດແລ້ວຢ່າງໜ້ອຍ 53 ລາຍໃນໄລຍະພຽງແຕ່ 10 ວັນ.
ສ່ວນທາງການທ້ອງຖິ່ນລະບຸວ່າ ຄາດວ່າເດັກນ້ອຍອາດໄດ້ຮັບສານພິດຈາກໝາກລິ້ນຈີ່ ຊຶ່ງເປັນໝາກໄມ້ຍອດນິຍົມຂອງທ້ອງຖິ່ນ ແລະ ມີການປູກຢ່າງກວ້າງຂວາງ ພ້ອມປະກາດເຕືອນໃຫ້ຜູ້ປົກຄອງເຝົ້າລະວັງລູກຫຼານຢ່າງໃກ້ຊິດ ແລະ ຫຼີກເວັ້ນການບໍລິໂພກໝາກລິ້ນຈີ່ໃນໄລຍະນີ້.
ທາງດ້ານ ທ່ານ ໂສກ ກຸມານ ຊຶ່ງເຈົ້າໜ້າທີ່ອາວຸໂສດ້ານສາທາລະນະສຸກປະຈຳລັດພິຫານກໍໄດ້ເປີດເຜີຍວ່າ ພົບເດັກເກືອບ 100 ຄົນໃນເຂດມູຊັຟຟາຣປຸຣະປ່ວຍເປັນພະ ຍາດສະໝອງອັກເສບກະທັນຫັນ ໂດຍຜູ້ປ່ວຍມີລະດັບນ້ຳຕານໃນເລືອດຕ່ຳລົງຢ່າງໄວວາເຖິງຂັ້ນວິກິດ ລວມທັງມີພາວະສະໝອງບວມ ມີອາການຊັກ ໝົດສະຕິ ແລະ ບາງຄົນມີອາການຮຸນແຮງເຖິງຂັ້ນເສຍຊີວິດ ເບື້ອງ ຕົ້ນມີລາຍງານການເສຍຊີວິດຂອງເດັກທີ່ເຈັບປ່ວຍດ້ວຍພະຍາດສະໝອງອັກເສບແລ້ວ 53 ລານ ໃນນັ້ນ ເປັນຜູ້ປ່ວຍຈາກໂຮງໝໍ 2 ແຫ່ງ ແລະ ອີກຫຼາຍກວ່າ 40 ຄົນຍັງປິ່ນປົວຢູ່ທີ່ໂຮງໝໍ.
ທັງນີ້ ເຂດມູຊັຟຟາຣປຸຣະ ແລະ ພື້ນທີ່ໃກ້ຄຽງຜະເຊີນກັບການແຜ່ລະບາດຂອງພະຍາດ ດັ່ງກ່າວໃນຊ່ວງລະດູຮ້ອນຂອງທຸກໆປີນັບແຕ່ປີ 1995 ໂດຍທ້ອງຖິ່ນເອີ້ນພະຍາດນີ້ວ່າ ພະຍາດສຳກິພຸຂາຣ ມີຈຳນວນຜູ້ເສຍຊີວິດຫຼາຍເປັນປະຫວັດການເຖິງ 150 ລາຍເມື່ອປີ 2014.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: www.khaosod.co.th