ທາງການຍີ່ປຸ່ນໄດ້ອອກປະກາດເຕືອນເມື່ອວັນທີ 10 ມິຖຸນາຜ່ານມາກ່ຽວກັບການນຳໃຊ້ກັນຊາໃນງານມະຫະກຳກີລາໂອລິມປິກ 2020 ທີ່ນະຄອນໂຕກຽວຖືເປັນເລື່ອງທີ່ຜິດກົດໝາຍ.

ທັງນີ້ ຜູ້ຈັດງານໂອລິມປິກໄດ້ຖະແຫຼງການເຕືອນຫຼາຍປະເທດທີ່ບໍ່ເຂັ້ມງວດກ່ຽວກັບກົດໝາຍການນຳໃຊ້ກັນຊາ ໃຫ້ແຈ້ງພົນລະ ເມືອງ ຫຼື ນັກກີລາທີ່ຈະມາຮ່ວມງານມະຫະກຳກີລາໂອລິມປິກທີ່ຍີ່ປຸ່ນວ່າ ການໃຊ້ກັນຊາເປັນສິ່ງທີ່ຜິດກົດໝາຍໃນປະເທດຍີ່ປຸ່ນ.

ຊຶ່ງມີບົດລົງໂທດຈຳຄຸກສູງເຖິງ 5 ປີສຳລັບຜູ້ເສບ ແລະ ໂທດຈຳຄຸກ 7 ປີສຳລັບຜູ້ທີ່ລັກລອບຄ້າ-ຂາຍ ຂະນະດຽວກັນກັນຊາຍັງຖືກຈັດຢູ່ໃນກຸ່ມຢາໂດ໊ບ (ຢາຊູກຳລັງ) ຂອງສຳນັກງານຕໍ່ຕ້ານການໃຊ້ຢາໂດ໊ບໂລກອີກດ້ວຍ.

ຮຽບຮຽງ: ສະຫະລັດ ວອນທິວົງໄຊ

ຮູບພາບ: thairath.co.th