ລັດຖະບານ ສປ ຈີນ ເປີດເຜີຍໂຕເລກສົ່ງອອກໃນຊ່ວງເດືອນພຶດສະພາຜ່ານມາ ຊຶ່ງເປັນຊ່ວງທີ່ມີຂໍ້ຂັດແຍ່ງດ້ານສົງຄາມການຄ້າກັບປະເທດມະຫາອຳນາດຂອງໂລກ ແຕ່ປາກົດວ່າພາກສົ່ງອອກຜັດຂະຫຍາຍຕົວເກີນທີ່ຄາດໝາຍເອົາໄວ້ ຊຶ່ງຂະຫຍາຍຕົວ 1,1% ຫຼັງຈາກທີ່ເຄີຍຫຼຸດລົງເຖິງ 2,7% ໃນເດືອນເມສາ ນອກຈາກນີ້ ຍັງສວນທາງກັນການຄາດຄະເນຂອງບັນດານັກວິເຄາະທີ່ເຊື່ອວ່າພາກສົ່ງອອກຂອງຈີນຈະຫຼຸດລົງເຫຼືອ 3,9%.
ບໍ່ພຽງເທົ່ານີ້ ໂຕເລກດຸນການຄ້າຍັງປັບຂຶ້ນມາຢູ່ທີ່ 4,17 ໝື່ນລ້ານໂດລາຈາທີ່ຫຼຸດລົງມາເຫຼືອ 1,38 ໝື່ນລ້ານໂດລາໃນເດືອນເມສາ ແຕ່ທີ່ບໍ່ໜ້າເຊື່ອກໍຄື ຂະນະທີ່ຈີນຖືກຂຶ້ນພາສີສິນຄ້າສົ່ງອອກໄປຍັງອາເມຣິກາ ແຕ່ໂຕເລກດຸນການຄ້າກັບອາເມຣິກາຜັດເພີ່ມຂຶ້ນມາຢູ່ທີ່ 2,69 ໝື່ນລ້ານໂດລາ ຈາກ 2,1 ໝື່ນລ້ານໂດລາໃນເດືອນເມສາ.
ຂະນະດຽວກັນ ເຖິງແມ່ນວ່າການສົ່ງອອກສິນຄ້າຈະມີການຂະຫຍາຍຕົວແຕ່ການນຳເຂົ້າຜັດສວນທາງ ຊຶ່ງສະແດງໃຫ້ເຫັນວ່າຈີນອາດຫັນມາເພິ່ງພາຕົນເອງແລ້ວຫຼຸດການສົ່ງອອກເພື່ອປ້ອງກັນຈຸດອ່ອນໃນລະຫວ່າງທີ່ກຳລັງເກີດຂໍ້ຂັດແຍ່ງກັບປະເທດມະຫາອຳນາດ ສ່ວນນັກວິເຄາະກໍໄດ້ສະແດງຄວາມຄິດເຫັນຕໍ່ກັບກໍລະນີດັ່ງກ່າວວ່າ ຈີນຈະໄດ້ຮັບຜົນກະທົບໃນໄລຍະຍາວຈາກສົງຄາມການຄ້າ ແລະ ຊີ້ວ່າການສົ່ງອອກທີ່ປັບຕົວດີຂຶ້ນເປັນຜົນມາຈາກການອ່ອນຄ່າລົງຂອງເງິນຢວນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: posttoday/AFP