ວາລະສານ Forbes ລາຍງານເມື່ອວັນທີ 8 ມິຖຸນາຜ່ານມາ ໂດຍໄດ້ຈັດອັນດັບໃຫ້ນັກຮ້ອງສາວ ຣີຮັນນາ ຂຶ້ນເປັນນັກຮ້ອງຍິງທີ່ຮັ່ງມີທີ່ສຸດໃນໂລກໃນຂະນະນີ້ ຊຶ່ງມີລາຍໄດ້ລວມຫຼາຍກວ່າ 600 ລ້ານໂດລາ ແຊງໜ້າ ຊິລິນ ດິອອນ ມາດອນນາ ແລະ ບີຢອນເຊ.
ທັງນີ້ ລາຍໄດ້ສ່ວນໃຫຍ່ຂອງ ຣີຮັນນາ ບໍ່ໄດ້ມາຈາກການຮ້ອງເພງ ແລະ ທົວຄອນເສີດ ແຕ່ມາຈາກການຮ່ວມງານກັບບໍລິສັດເຄື່ອງສຳອາງຍັກໃຫຍ່ຂອງຝຣັ່ງນັ້ນກໍຄື LVMH ທີ່ເຮັດໃຫ້ ຣີຮັນນາ ສາມມາດເປີດຕົວເຄື່ອງສຳອາງ Fenty Beauty ທີ່ມີຍອດຂາຍຖະຫຼົ່ມຖະລາຍທົ່ວໂລກ ແລະ ສ້າງລາຍໄດ້ຫຼາຍກວ່າ 100 ລ້ານໂດລາ.
ນອກຈາກນີ້ ຣີຮັນນາ ຍັງມີລາຍໄດ້ຈາກແບຣນເສື້ອຊ້ອນໃນໃນຊື່ Savage Fenty ອີກດ້ວຍ ຄາດວ່າລາຍໄດ້ຂອງນາງຈະຍິ່ງເພີ່ມສູງຂຶ້ນໄປອີກຈາກການເປີດໂຕແບຣນແຟເຊິນໃນຊື່ Fenty ຊຶ່ງຈະມີທັງເສື້ອຜ້າ ເຄື່ອງປະດັບ ແລະ ເກີບ ພາຍໃຕ້ສະໂລແກນທີ່ວ່າ “ເຮັດເສື້ອຜ້າ ແລະ ເຄື່ອງປະດັບໃຫ້ເຂົ້າກັບແມ່ຍິງທຸກຄົນ ທຸກເຊື້ອຊາດ ແລະ ທຸກຮູບຮ່າງ”.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: teenee.com