ຖະແຫຼງຂ່າວຢ່າງເປັນທາງການສຳລັບງານຕະຫຼາດນັດແຮງງານປະຈຳປີ 2019 ຊຶ່ງຈັດຂຶ້ນເມື່ອວັນທີ 7 ມິຖຸນາຜ່ານມາທີ່ສູນການຄ້າລາວ-ໄອເຕັກ (ຕຶກເກົ່າ) ນະຄອນຫຼວງວຽງຈັນ ລະຫວ່າງພະແນກແຮງງານ ແລະ ສະຫວັດດີການສັງຄົມ ນະຄອນຫຼວງວຽງຈັນ ຮ່ວມກັບບໍລິສັດລາວເວີນ ມະຫາຊົນ.
ໂດຍການເປັນປະທານຂອງ ທ່ານ ນາງ ລຳພອນ ສີອັກຄະຈັນ ຫົວໜ້າພະແນກແຮງງານ ແລະ ສະຫວັດດີການສັງຄົມ ນະຄອນ ຫຼວງວຽງຈັນ ແລະ ທ່ານ ສີບຸນທຳ ສີບຸນມີ ຜູ້ອຳນວຍການບໍລິສັດ ລາວເວີນ ມະຫາຊົນ ໃຫ້ກຽດເຂົ້າຮ່ວມຂອງບັນດາເຈົ້າເມືອງທັງ 9 ຕົວເມືອງ ແລະ ພາກສ່ວນກ່ຽວຂ້ອງ.
ໂອກາດດັ່ງກ່າວ ທ່ານ ນາງ ລຳພອນ ໄດ້ກ່າວວ່າ ງານຕະຫຼາດນັດແຮງງານໃນປີນີ້ຈະເນັ້ນການສ້າງເງື່ອນໄຂໃຫ້ບັນດາຜູ້ປະກອບການ ແລະ ຜູ້ທີ່ພວມຊອກວຽກເຮັດງານທຳ ໄດ້ມາພົບປະ ແລະ ຮ່ວມຫາລືກ່ຽວກັບການຈັດຕັ້ງຜັນຂະຫຍາຍ ລວມທັງການສົ່ງເສີມວຽກງານພັດທະນາດ້ານສີມືແຮງງານ ລວມເຖິງການຈັດຫາງານເພື່ອຕອບສະໜອງສີມືແຮງງານ ບໍ່ວ່າຈະເປັນທາງດ້ານປະລິມານ ແລະ ຄຸນນະພາບໃຫ້ທຽບເທົ່າລະດັບພາກພື້ນ ແລະ ສາກົນ.
ໂດຍຈຸດປະສົງຂອງການຈັດງານກໍເພື່ອສ້າງໂອກາດ ແລະ ອຳນວຍຄວາມສະດວກໃຫ້ຜູ້ທີ່ກຳລັງຊອກຫາວຽກເຮັດງານທຳ ແລະ ບັນດາຫົວໜ່ວຍແຮງງານໄດ້ມີພື້ນທີ່ພົບປະແລກປ່ຽນ ທັງເປັນການໂຄສະນາຂໍ້ມູນ-ຂ່າວສານຕະຫຼາດແຮງງານເພື່ອຫຼຸດຜ່ອນອັດ ຕາການວ່າງງານ ຫຼຸດຜ່ອນການເຄື່ອນຍ້າຍແຮງງານໄປຕ່າງປະເທດແບບບໍ່ຖືກກົດໝາຍ ພ້ອມນີ້ ກໍຖືເປັນການສົ່ງເສີມ ແລະ ສ້າງວຽກເຮັດງານທຳໃຫ້ຄົນພາຍໃນປະເທດອີກດ້ວຍ ຊຶ່ງຄາດວ່າງານໃນປີ 2019 ຈະສາມາດສ້າງວຽກເຮັດງານທຳໄດ້ຫຼາຍກວ່າ 2.000 ຕຳແໜ່ງໃນຫຼາຍສາຂາອາຊີບ.
ໂດຍ: ສະຫະລັດ ວອນທິວົງໄຊ