ສຳນັກຂ່າວຊື່ດັງຂອງຣັດເຊຍລາຍງານເມື່ອບໍ່ດົນມານີ້ວ່າ ພູໄຟອູດິນາ (Udina) ໃນຄາບມະຫາສະໝຸດຄຳຊັຕກາ ໃນພູມີພາກຕາເວັນອອກຂອງຣັດເຊຍ ໜຶ່ງໃນພື້ນທີ່ມໍລະດົກໂລກຂອງອຸຍເນສໂກທີ່ເຄີຍຄິດວ່າເປັນພູໄຟທີ່ດັບມອດໄປແລ້ວ ຫຼ້າສຸດ ໄດ້ສະແດງສັນຍານຂອງຄວາມເຄື່ອນໄຫວ ແລະ ເຮັດໃຫ້ນັກວິທະຍາສາດຕ້ອງປັບສະຖານະຈາກເດີມທີ່ເອີ້ນວ່າດັບມອດໄປແລ້ວ (Extinct) ມາເປັນພູໄຟທີ່ຍັງປະທຸ (Active).

ທັງນີ້ ນັກວິທະຍາສາດຍັງເຕືອນວ່າ ຖ້າຫາກພູໄຟອູດິນາປະທຸ ຫຼື ລະເບີດອາດສ້າງຄວາມເສຍຫາຍໃນລະດັບເທົ່າກັບມະຫັນຕະໄພຈາກພູໄຟວິຊູເວຍທີ່ທຳລາຍລ້າງເມືອງປອມເປອີໃນສະໄໝໂຣມັນ ຂະນະທີ່ ອິວານ ຄູລາຄອຟ ຫົວໜ້າຫ້ອງທົດລອງເອັກເຣຄອມພິວເຕີກວດສອບສະພາບແຜ່ນດິນໄຫວແຫ່ງຣັດເຊຍໄດ້ລະບຸກ່ຽວກັບຄວາມສ່ຽງທີ່ພູໄຟອູດິນາມີໂອກາດທີ່ຈະປະທຸເປັນຄັ້ງທຳອິດຊຶ່ງນັ້ນອາດໝາຍເຖິງຫາຍະນະໄພທີ່ມີຄວາມຮຸນແຮງ.

ພູໄຟອູດິນາປະກອບດ້ວຍຍອດພູ 2 ຍອດຄື Bolshaya Udina ສູງ 2.920 ແມັດ ແລະ Malaya Udina ທີ່ມີຄວາມສູງ 1.945 ແມັດ ຊຶ່ງເປັນສ່ວນໜຶ່ງຂອງມໍລະດົກໂລກດ້ານພູໄຟແຫ່ງຄຳຊັຕກາ (Volcanoes of Kamchatka) ທີ່ໄດ້ຮັບການຮັບຮອງໂດຍອຸຍເນສໂກວ່າເປັນພູໄຟທີ່ມີຄວາມງົດງາມ ແລະ ໜ້າຫຼົງໄຫຼທີ່ສຸດໃນໂລກ.

ຮຽບຮຽງ: ສະຫະລັດ ວອນທິວົງໄຊ

ຮູບພາບ: Nasa