ປິດສາກລົງແລ້ວສຳລັບການງານແຂ່ງຂັນ Vientiane Center 3×3 Basketball League ຮອບຊີງຊະນະ ຊຶ່ງຈັດຂຶ້ນເມື່ອວັນທີ 8 ມີຖຸນາ 2019 ທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ.
ໃຫ້ກຽດເປັນປະທານໂດຍ ທ່ານ Xubo ຮອງຜູ້ອຳນວຍການສູນການຄ້າວຽງຈັນເຊັນເຕີ ພ້ອມດ້ວຍຜູ້ສະໜັບສະໜູນບໍ່ວ່າຈະເປັນ OPPO Major platinum Cineplex NISSAN KING SPORT B Visions ໂຮງຮຽນນານາຊາດລາວ ນ້ຳດື່ມຄູນຊ້າງ ແລະ ສູນການຄ້າວຽງຈັນເຊັນເຕີ.
ສຳລັບງານ Vientiane Center 3×3 Basketball League ໄດ້ເລີ່ມແຂ່ງຂັນມາຕັ້ງແຕ່ວັນທີ 19-23 ພຶດສະພາ 2019 (ຮອບຄັດເລືອກ) ແລະ ຮອບຊີງຊະນະເລີດແມ່ນຈັດຂຶ້ນໃນວັນທີ 7–8 ມີຖຸນາ 2019 ທີ່ສູນການຄ້າວຽງຈັນເຊັນເຕີ.
ທັງນີ້ ເປັນການແຂ່ງຂັນໃນຮູບແບບ 3×3 ໃນພື້ນທີ່ຂະໜາດ 14×15 ແມັດ ຊຶ່ງຖືເປັນຄັ້ງທຳອິດທີ່ຈັດການແຂ່ງຂັນພາຍໃນສູນການຄ້າແຫ່ນີ້ ຊຶ່ງການຈັດງານໃນຄັ້ງນີ້ຖືວ່າປະສົບຜົນສຳເລັດຢ່າງສູງ ແລະ ມີການຕອບຮັບຈາກທີມນັກກີລາຊື່ດັງໃນ ສປປ ລາວ ຫຼາຍທີມທີ່ເຂົ້າຮ່ວມແຂ່ງຂັນ.
ໃນນັ້ນ ມີທີມທີ່ເຂົ້າຮ່ວມການແຂ່ງຂັນທັງໝົດ 92 ທີມ (ສະໝັກຫຼິ້ນ ແລະ ອາຊີບ) ໂດຍໄດ້ແບ່ງການແຂ່ງຂັນເປັນ 3 ລຸ້ນຄື ລຸ້ນອາຍຸຕ່ຳກວ່າ 14 ປີ ລຸ້ນອາຍຸ 15-17 ປີ ແລະ ລຸ້ນອາຍຸ 23 ປີຂຶ້ນໄປ ຊີງລາງວັນລວມມູນຄ່າ 20 ລ້ານກີບ.
ຈຸດປະສົງໃນການຈັດງານຄັ້ງນີ້ແມ່ນເປັນການເປີດໂອກາດໃຫ້ນັກກີລາແຂ່ງຂັນ Basketball ທັງມືສະໝັກຫຼິ້ນ ແລະ ມືອາຊີບທັງພາຍໃນ ແລະ ຕ່າງປະເທດໄດ້ມີພື້ນທີ່ສະແດງຄວາມສາມາດ ແລະ ທັກສະທາງດ້ານກີລາ ທັງເພື່ອສ້າງໃຫ້ໄວໜຸ່ມລາວຫັນມາໃສ່ໃຈເລື່ອງສຸຂະພາບ ນອກຈາກນີ້ ຍັງເປັນການສົ່ງເສີມກີລາ Basketball ໃຫ້ເປັນກີລາທີ່ມີຄວາມນິຍົມໃນປະເທດລາວ.
ໂດຍ: ສະຫະລັດ ວອນທິວົງໄຊ