ປະທານາທິບໍດີ ສີຈິ້ງ ຜິງ ແຫ່ງ ສປ ຈີນ ຊຶ່ງຢູ່ລະຫວ່າງເດີນທາງຢ້ຽມຢາມຣັດເຊຍຢ່າງ ເປັນທາງການ ເນື່ອງໃນໂອກາດຄົບຮອບ 70 ປີຄວາມສຳພັນຂອງທັງສອງປະເທດ ຂະນະທີ່ປະທານາທິບໍດີຂອງຣັດເຊຍກໍໄດ້ກ່າວຕ້ອນຮັບຜູ້ນຳຈີນໂດຍມີເນື້ອໃນວ່າ ຈີນນັບເປັນມິດແທ້ທີ່ສຸດຂອງຣັດເຊຍ ທັງນີ້ ຖືເປັນສັນຍານຄວາມໄວ້ວາງໃຈ ແລະ ຄວາມຮ່ວມມືທີ່ແໜ້ນແຟ້ນຂອງທັງສອງປະເທດ ໂດຍໃນໄລຍະ 6 ປີທີ່ຜ່ານມາທັງສອງປະເທດໄດ້ມີໂອກາດພົບປະກັນຫຼາຍກວ່າ 30 ຄັ້ງ.
ໂອກາດດັ່ງກ່າວຜູ້ນຳ ສປ ຈີນ ໄດ້ເປີດໂຕແພນດ້າສອງໂຕທີ່ມີຊື່ວ່າ Ru Yi ແລະ Ding Ding ຊຶ່ງເປັນແພນດ້າທີ່ທາງການຈີນໄດ້ມອບໃຫ້ເປັນຂອງທີ່ລະນຶກແກ່ສວນສັດໃນນະຄອນຫຼວງມົສກູເປັນເວລາ 15 ປີພາຍໃຕ້ໂຄງການຄວາມຮ່ວມມືວິໄຈແພນດ້າລະຫວ່າງສອງຊາດ.
ຂະນະທີ່ຜູ້ນຳຣັດເຊຍໄດ້ກ່າວວ່າ ນັບເປັນການສະແດງຄວາມເຄົາລົບ ແລະ ການໄວ້ເນື້ອເຊື່ອໃຈທີ່ພິເສດຂອງສອງຊາດ ໂດຍຣັດເຊຍຂໍຮັບຂອງຂວັນນີ້ດ້ວຍຄວາມເຄົາລົບ ແລະ ຂອບໃຈຢ່າງສູງ ນອກຈາກນີ້ ທັງສອງຜູ້ນຳຍັງໃຫ້ຄຳໝັ້ນວ່າຈະສານສຳພັນດ້ານການທະຫານ ແລະ ການຄ້າໃຫ້ສະໜິດແໜ້ນຍິ່ງໆຂຶ້ນພາຍໃຕ້ການລົງນາມຂໍ້ຕົກລົງຂອງທັງສອງລັດຖະບານ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AFP