ສຳນັກຂ່າວຕ່າງປະເທດລາຍງານເມື່ອວັນທີ 6 ມິຖຸນາຜ່ານມາວ່າ ອົງການອະນາໄມໂລກ ຫຼື WHO ອອກມາເຕືອນເຖິງຄວາມບໍ່ປະສົບຜົນສຳເລັດໃນການຄວບຄຸມການແຜ່ລະບາດຂອງພະຍາດຕິດຕໍ່ທາງເພດສຳພັນໃນທົ່ວໂລກຊຶ່ງສົ່ງຜົນໃຫ້ມີຜູ້ຕິດເຊື້ອພະຍາດທາງເພດສຳພັນທີ່ສາມາດປິ່ນປົວໄດ້ (STD) ຫຼື ການຕິດເຊື້ອພະຍາດທາງເພດສຳພັນ (STI) ລາຍໃໝ່ເກີດຂຶ້ນໃນແຕ່ລະວັນເຖິງ 1 ລ້ານຄົນ ຂະນະທີ່ WHO ພົບວ່າ ເມື່ອປີ 2016 ມີຜູ້ຕິດເຊື້ອລາຍໃໝ່ ໂດຍສະເພາະພະຍາດຄລາໄມເດຍ (ໜອງໄນທຽມ) ພະຍາດໜອງໄນ ພະຍາດເຊື້ອທຣິໂຄໂມແນສ ແລະ ພະຍາດຊິຟິລິສ ຊຶ່ງທົ່ວໂລກມີຈຳນວນຜູ້ຕິດເຊື້ອຫຼາຍກວ່າ 376 ລ້ານຄົນ.
ຂະນະທີ່ລາຍງານສະລັບຫຼ້າສຸດຂອງ WHO ລະບຸວ່າ ເມື່ອປີ 2016 ຊຶ່ງເປັນປີທີ່ມີການເກັບກຳ ແລະ ລວບລວມຂໍ້ມູນພົບວ່າ ມີປະຊາກອນປະມານ 127 ລ້ານຄົນທົ່ວໂລກ (ອາຍຸລະຫວ່າງ 15-49 ປີ) ຕິດເຊື້ອພະຍາດຄລາໄມເດຍ 87 ລ້ານຄົນຕິດເຊື້ອພະຍາດໜອງໄນ 6,3 ລ້ານຄົນຕິດເຊື້ອພະຍາດຊິຟິລິສ ແລະ ມີຄົນຕິດເຊື້ອພະຍາດທຣິໂຄໂມແນສຊຶ່ງເປັນພະຍາດຕິດຕໍ່ທາງເພດສຳພັນປະມານ 156 ລ້ານຄົນ.
ໂດຍສະເລ່ຍແລ້ວປະມານ 1 ໃນ 15 ຄົນຂອງປະຊາກອນໂລກມີການຕິດເຊື້ອ (STI) ຢ່າງໜ້ອຍ 1 ຊະນິດ ພ້ອມນີ້ WHO ກໍໄດ້ລະບຸອີກວ່າ ການຕິດເຊື້ອ (STI) ໃນໄລຍະທຳອິດຈະບໍ່ສະແດງອາການອອກມາ ຈຶ່ງເຮັດໃຫ້ຜູ້ປ່ວຍບໍ່ຮູ້ຕົວວ່າຕົນເອງຕິດເຊື້ອ ແລະ ຈຳເປັນຕ້ອງປິ່ນປົວ ຊຶ່ງສົ່ງຜົນໃຫ້ພະຍາດຕິດຕໍ່ທາງເພດສຳພັນເຫຼົ່ານີ້ແຜ່ກະຈາຍຕໍ່ໄປ.
ທັງນີ້ WHO ໄດ້ລະບຸວ່າ ພະຍາດຊິຟີລິສພຽງຢ່າງດຽວສົ່ງຜົນໃຫ້ເດັກອ່ອນຕາຍໃນທ້ອງແມ່ ແລະ ຕາຍນັບແຕ່ມື້ເກີດເມື່ອປີ 2016 ມີຈຳນວນເຖິງ 200.000 ລາຍ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: matichon