ບໍລິສັດອູເບີ (Uber) ຊຶ່ງເປັນບໍລິສັດຜູ້ໃຫ້ບໍລິການ Ridesharing ລາຍໃຫຍ່ໄດ້ອອກມາລະບຸເມື່ອວັນທີ 6 ມິຖຸນາຜ່ານມາວ່າ ຈະເປີດໃຫ້ບໍລິການເຮລິຄ໋ອບແຕໂດຍສານຊຶ່ງເປັນບໍລິການເດີນທາງເທິງອາກາດລະຫວ່າງສະໜາມບິນເຈເອຟເຄ (JFK) ໃນນະຄອນນິວຢອກໄປຍັງເມືອງແມນຮັຕຕັນຂອງສະຫະລັດອາເມຣິກາ.

ຖ້ຽວບິນດັ່ງກ່າວຈະໃຊ້ເວລາປະມານ 8 ນາທີ ໂດຍຈະເລີ່ມຕົ້ນຖ້ຽວທຳອິດໃນວັນທີ 9 ມິຖຸນາ ຂະນະທີ່ຄ່າບໍລິການຢູ່ທີ່ປະມານ 200-250 ໂດລາ ທັງນີ້ ກະແສຂ່າວດັ່ງກ່າວເປັນການຢືນຢັນຄວາມກະຕືລືລົ້ນຂອງ Uber ທີ່ຕ້ອງການໃຫ້ບໍລິການໃນດ້ານການບໍລິການຂົນສົ່ງອື່ນໆນອກຈາກການບໍລິການຕາມທ້ອງຖະໜົນ ຊຶ່ງໃນຄວາມພະຍາຍາມເພື່ອຫາຄວາມຮ່ວມມືກັບ “aerial ridesharing” ຊຶ່ງມີຄວາມແຕກຕ່າງຈາກບໍລິການເຮລິຄ໋ອບແຕອື່ນໆ ຊຶ່ງກ່ອນໜ້ານີ້ Uber ກໍເຄີຍປະກາດແຜນການຂົນສົ່ງທາງອາກາດພາຍໃນປີ 2023 ລະຫວ່າງເຂດນອກເມືອງ ແລະ ຕົວເມືອງ ລວມເຖິງບໍລິການລະຫວ່າງເມືອງໃນອາເມຣິກາລວມເຖິງເປີດໃຫ້ບໍລິການໃນຕ່າງປະເທດ.

ຮຽບຮຽງ: ສະຫະລັດ ວອນທິວົງໄຊ

ຮູບພາບ: AFP