ເມື່ອວັນທີ 6 ມິຖຸນາ 2019 ສະຖານີໂທລະພາບ CCTV ຂອງຈີນ ແລະ ເວັບໄຊໄດ້ເຜີຍແຜ່ຄລິບນາທີທີ່ຈີນປະສົບຄວາມສຳເລັດໃນການຍິງຈະຫຼວດ Long March11 ຂົນສົ່ງດາວທຽມຂຶ້ນສູ່ອະວະກາດຈາກເຮືອນເປັນຄັງທຳອິດ ແລະ ເຮັດໃຫ້ຈີນກາຍເປັນຊາດທີ 3 ຂອງໂລກຕໍ່ຈາກອາເມຣິກາ ແລະ ຣັດເຊຍ ທີ່ປະສົບຄວາມສຳເລັດໃນການປ່ອຍຈະຫຼວດຂົນສົ່ງດາວທຽມຈາກຍານ ຫຼື ເຮືອ.
ຈີນມຸ່ງໝັ້ນໄປສູ່ການເປັນຊາດທີ່ນຳໜ້າດ້ານເຕັກໂນໂລຊີອະວະກາດ ໂດຍໄດ້ທົດສອບຍິງຈະຫຼວດ ລອງມາຣກ 11 ຈາກເຮືອທີ່ລອຍໃນທະເລເຫຼືອງຫ່າງຈາກມົນທົນຊານຕົງ ທາງພາກຕາເວັນອອກຂອງຈີນເມື່ອເວລາ 12:06 ນາທີຂອງວັນທີ 5 ມິຖຸນາ 2019 (ຕາມເວລາທ້ອງຖິ່ນ) ຊຶ່ງຖືເປັນການຍິງຈະຫຼວດລຸ້ນນີ້ເປັນຄັງທີ 7 ຫຼັງຈາກໄດ້ທົດສອບຄັ້ງທຳອິດເມື່ອປີ 2015 ແລະ ນັບເປັນຄວາມພະຍາຍາມໃນການຍິງຈະຫຼວດ ລອງມາຣກ 11 ຈາກເຮືອເປັນຄັງທຳອິດ ແລະ ປະສົບຄວາມສຳເລັດຢ່າງຍິ່ງໃຫຍ່.
ລາຍງານຂ່າວດຽວກັນໃຫ້ຮູ້ອີກວ່າ ດາວທຽມທີ່ຖືກສົ່ງຂຶ້ນໄປກັບຈະຫຼວດ ລອງມາຣກ 11 ໃນຄັ້ງນີ້ເປັນດາວທຽມທຸລະກິດທີ່ມີຂະໜາດນ້ອຍ 5 ດວງ ແລະ ດາວທຽມທີ່ໃນທົດລອງໃນທາງເຕັກໂນໂລຊີ 2 ດວງທີ່ມີຂະໜາດໃຫຍ່ກວ່າ ມີຊື່ວ່າ Bufeng-1A ແລະ Bufeng-1B ສ້າງໂດຍສະຖາບັນເຕັກໂນໂລຊີອະວະກາດໃນນະຄອນຫຼວງປັກກິ່ງ ໂດຍຈະຖືກນຳໃຊ້ໃນການສັງເກດການຂອງກະແສລົມເໜືອມະຫາສະໝຸດເພື່ອຊ່ວຍເພີ່ມປະສິດທິພາບສຳລັບການພະຍາກອນອາກາດ.
ຮຽບຮຽງ: ບຸດສະດີ ສາຍນໍ້າມັດ
ແຫຼ່ງຂໍ້ມູນ: thairath