ນັກປີນພູໃນປະເທດເນປາລຮ່ວມກັນນຳຮ່າງໄຮ້ວິນຍານຂອງນັກປືນພູ 4 ລາຍ ແລະ ຂີ້ເຫຍື້ອຈຳນວນໜຶ່ງຈາກທັງໝົດ 11 ໂຕນລົງມາຈາກຍອດພູເອເວີເຣສ ຊຶ່ງຖືເປັນສ່ວນໜຶ່ງໃນແຜນການຂອງລັດຖະບານເນປາລທີ່ຈະເຮັດຄວາມສະອາດຍອດພູທີ່ສູງທີ່ສຸດໃນໂລກ.
ພູເອເວີເຣສຊຶ່ງມີຄວາມສູງເຖິງ 8.850 ແມັດ ປັດຈຸບັນພົບວ່າຕາມສັນພູ ແລະ ອີກຫຼາຍແຫ່ງເຕັມໄປດ້ວຍຂີ້ເຫຍື້ອຫຼາກຫຼາຍຊະນິດ ລວມເຖິງຂວກອົກຊີແຊນທີ່ໃຊ້ແລ້ວ ເຊືອກ ຂັ້ນໄດ ກະປ໋ອງ ແລະ ຂີ້ເຫຍື້ອພລາສຕິກທີ່ເປັນຂອງບັນດານັກປີນພູ (ບາງກຸ່ມ).
ນອກເໜືອຈາກຂີ້ເຫຍື້ອແລ້ວ ນັກປີນພູຂອງເນປາລຍັງໄດ້ພົບສົບນັກປີນພູທີ່ເສຍຊີວິດອີກ 4 ລາຍ ແຕ່ຍັງບໍ່ສາມາດຮູ້ໄດ້ວ່າແມ່ນໃຜ ແລະ ເສຍຊີວິດເມື່ອໃດ? ຈາກທັງໝົດ 300 ຄົນທີ່ຕ້ອງເອົາຊີວິດມາຖິ້ມໄວ້ກັບສະຖານທີ່ແຫ່ງນີ້ ຂະນະທີ່ ທ່ານ ດັນດູ ຣາຊ ອະທິບໍດີກົມການທ່ອງທ່ຽວຂອງເນປາລໄດ້ເປີດເຜີຍວ່າ ທີມນັກປີນພູຈຳນວນ 20 ຄົນຊຶ່ງເປັນຄົນນຳທາງໃນພື້ນທີ່ ຫຼື ທີ່ຮູ້ຈັກກັນໃນນາມ “ເຊີຣປາ” ໄດ້ເຮັດຄວາມສະອາດໂດຍເກັບຂີ້ເຫຍື້ອໄປແລ້ວລວມ 11 ໂຕນເມື່ອລະຫວ່າງເດືອນເມສາຫາເດືອນພຶດສະພາທີ່ຜ່ານມາ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: REUTERS