ອົງການຕຳຫຼວດອາຊະຍາກຳລະຫວ່າງປະເທດລະຫວ່າງປະເທດ ຫຼື ອິນເຕີຣໂພລໄດ້ອອກໝາຍຈັບ (ໝາຍແດງ) ຜູ້ຕ້ອງຫາໜີຄະດີຈຳນວນ 7 ຄົນທີ່ກໍ່ອາຊະຍາກຳດ້ານສິ່ງແວດລ້ອມນັບຕັ້ງແຕ່ການຕັດໄມ້ທຳລາຍປ່າ ລວມເຖິງການລັກລອບລ່າຊ້າງ ແລະ ຄ້າງາຊ້າງ ເຫຼົ່ານີ້ເປັນຕົ້ນ ທັງນີ້ ອິນເຕີຣໂພລແມ່ນເຮັດວຽກຮ່ວມກັບ 194 ປະເທດທົ່ວໂລກ ເພື່ອປະສານຄວາມຮ່ວມມືຕໍ່ຕ້ານອົງກອນອາຊະຍາກຳ ແລະ ປະຕິບັດການຕໍ່ຕ້ານການກໍ່ການຮ້າຍ.
ໂດຍການອອກໝາຍຈັບດັ່ງກ່າວຖືວ່າຍັງບໍ່ເຄີຍປາກົດມີມາກ່ອນ ຊຶ່ງອອກໂດຍອົງການຕຳຫຼວດສາກົນທີ່ມີສຳນັກງານໃຫຍ່ຢູ່ທີ່ເມືອງລຽງ ປະເທດຝຣັ່ງ ໂດຍການອອກໝາຍຈັບດັ່ງກ່າວມີຂຶ້ນກ່ອນວັນສິ່ງແວດລ້ອມໂລກພຽງ 1 ວັນ.
ທ່ານ ທິມ ມໍຣິສ ຜູ້ອຳນວຍການອິນເຕີຣໂພລໄດ້ຮຽກຮ້ອງຕໍ່ປະເທດຕ່າງໆທົ່ວໂລກທີ່ຜູ້ຕ້ອງຫາອາດຈະອາໄສ ຫຼື ຫຼົບໜີໃນຂະນະນີ້ ກໍຂໍຄວາມຮ່ວມມືກໍລະນີພົບເຫັນກຸ່ມຄົນດັ່ງກ່າວກໍສາມາດຈັບກຸມໄດ້ທັນທີ ທັງນີ້ ໃນໝາຍແດງໄດ້ລະບຸຊື່ຜູ້ຕ້ອງຫາທັງ 7 ຄົນ ຊຶ່ງເປັນທີ່ຕ້ອງການຂອງທາງການເກັນຢາ ເກຣັກ ແລະ ອີສວາຕິນີອະດີດປະເທດສະວາຊິແລນ.
ທັງນີ້ ອາຊະຍາກຳສິ່ງແວດລ້ອມສາມາດສ້າງລາຍໄດ້ຢ່າງມະຫາສານຄິດສະເລ່ຍປະມານ 100.000-300.000 ລ້ານໂດລາຕໍ່ປີ ຂະນະທີ່ການຟອກເງິນ ການສໍ້ໂກງ ອາຊະຍາກຳ ການເງິນ ຄວາມຮຸນແຮງ ແລະ ຄາຕະກຳ ລ້ວນກ່ຽວຂ້ອງກັບອາຊະຍາກຳສິ່ງແວດລ້ອມ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AFP