ປັດຈຸບັນ ໂຕເລກປະລິມານຂີ້ເຫຍື້ອທົ່ວໂລກເພີ່ມຂຶ້ນຢ່າງມະຫາສານ ຊຶ່ງກາຍເປັນສິ່ງທີ່ທົ່ວໂລກຕ້ອງຫາມາດຕະການຮັບມື ແລະ ແກ້ໄຂຢ່າງຮີບດ່ວນ ຂະນະທີ່ຂີ້ເຫຍື້ອໃນແຕ່ລະປີທີ່ຜະລິດມີຫຼາຍກວ່າປີລະ 2,12 ພັນລ້ານໂຕນທີ່ຖືເປັນໂຕການສ້າງແກ໊ສເຮືອນແກ້ວຢ່າງໜ້ອຍ 5% ຂອງແກ໊ສເຮືອນແກ້ວທັງໝົດ ທັງນີ້ ຄາດຄະເນວ່າໂຕເລກດັ່ງກ່າວຈະເພີ່ມຂຶ້ນເປັນ 3,4 ພັນລ້ານໂຕນພາຍໃນອີກ 30 ປີຂ້າງໜ້າຕາມການຄາດຄະເນຂອງທະນາຄານໂລກ.

ຂະນະທີ່ລັດຖະບານຂອງປະເທດຂະໜາດໃຫຍ່ທົ່ວໂລກກໍໄດ້ເພີ່ມຄວາມພະຍາຍາມໃນການພັດທະນາໂຄງການຣີໄຊເຄິລຂີ້ເຫຍື້ອ ຫຼື ການນຳກັບມາໃຊ້ໃໝ່ຢ່າງຕໍ່ເນື່ອງ ຊຶ່ງໃນປີ 2018 ຜ່ານມາ ບໍລິສັດ ຢູໂນເມຍ ຣີເຊີດ ແອນ ຄອນຊັລຕິງ (Eunomia Research and Consulting) ຊຶ່ງເປັນບໍລິສັດດ້ານສິ່ງແວດລ້ອມໄດ້ຮ່ວມມືກັບສຳນັກງານສິ່ງແວດລ້ອມແຫ່ງເອີຣົບລວບ ລວມຂໍ້ມູນປະເພດີ່ມີອັດຕາການຣີໄຊເຄິລຂີ້ເຫຍື້ອຫຼາຍທີ່ສຸດໃນໂລກ 5 ອັນດັບດັ່ງນີ້.

1. ເຢຍລະມັນ ນັບຕັ້ງແຕ່ປີ 2016 ເຢຍລະມັນກາຍເປັນປະເທດທີ່ມີອັດຕາການຣີໄຊເຄິລຂີ້ເຫຍື້ອດີທີ່ສຸດໃນໂລກ ຊຶ່ງເມື່ອປີຜ່ານມາເຢຍລະມັນຣີໄຊເຄິລຂີ້ເຫຍື້ອໄດ້ເຖິງ 56,1% ຂອງຂີ້ເຫຍື້ອທັງໝົດທີ່ຜະລິດອອກມາ ໂດຍຈຸດເລີ່ມຕົ້ນຂອງຄວາມສຳເລັດເກີດຂຶ້ນເມື່ອປີ 1996.
2. ອອສເຕຣຍ ຣີໄຊເຄິລຂີ້ເຫຍື້ອໄດ້ 53,8% ເມື່ອປີ 2018 ຊຶ່ງຖືເປັນປະເທດທີ່ມີກົດໝາຍຫ້າມນຳຂີ້ເຫຍື້ອຫຼາຍປະເພດໄປຖິ້ມໃນຂຸມກຳຈັດຂີ້ເຫຍື້ອ ຫ້າມຖິ້ມຜະລິດຕະພັນໃດກໍຕາມທີ່ມີອັດຕາປ່ອຍສານອິນຊີຄາຣບອນຫຼາຍກວ່າ 5% ທັງນີ້ ອອສເຕຣຍຍັງເປັນປະເທດທີ່ເຊື່ອໝັ້ນໃນເລື່ອງເສດຖະກິດໝຸນວຽນ ແລະ ມີຊື່ສຽງເລື່ອງການສອນໃຫ້ພົນລະເມືອງອາຍຸນ້ອຍເຂົ້າໃຈເຖິງຄວາມສຳຄັນຂອງການຣີໄຊເຄິລຂີ້ເຫຍື້ອທີ່ສຸດຜ່ານສື່ຕ່າງໆ ໃນນັ້ນ ລວມເຖິງກາຕູນ ແລະ ປື້ມຮູບພາບ.
3. ສ.ເກົາຫຼີ ເປັນປະເທດດຽວທີ່ບໍ່ແມ່ນຊາດໃນທະວີບເອີຣົບທີ່ຕິດ Top 5 ປະເທດຣີໄຊເຄິລຂີ້ເຫຍື້ອດີທີ່ສຸດນໂລກ ທັງນີ້ ສ.ເກົາຫຼີ ຣີໄຊເຄລໄປແລ້ວປະມານ 53,7% ໂດຍອາໄສລະບົບທີ່ບໍລິສັດເອກະຊົນຕ່າງໆຊື້ຂີ້ເຫຍື້ອແລ້ວນຳໄປຂາຍຕໍ່ເພື່ອສ້າງມູນຄ່າເພີ່ມ.
4. ເວລສ ສາມາດຣີໄຊເຄິລຂີ້ເຫຍື້ອໄດ້ເຖິງ 52,2% ເມື່ອປີ 2018 ທີ່ຜ່ານມາ ໂດຍວິທີການຂອງເວລສແມ່ນລັດຖະບານ ຫຼື ຜູ້ບໍລິຫານຂັ້ນທ້ອງຖິ່ນ ແລະ ວາງລະບົບໃຫ້ປະຊາຊົນ ແລະ ພາກທຸລະກິດທົ່ວປະເທດປະຕິບັດກົດລະບຽບຄ້າຍຄືກັນນັ້ນກໍຄື ຂີ້ເຫຍື້ອປະເພດໃດຣີໄຊເຄິລໄດ້ ແລະ ບໍ່ໄດ້ ທັງນີ້ ເວລສ ຍັງວາງເປົ້າໝາຍທີ່ຊັດເຈນ ໂດຍຕັ້ງເປົ້າທີ່ຈະເພີ່ມອັດຕາການຣີໄຊເຄິລຂີ້ເຫຍື້ອທົ່ວປະເທດໃຫ້ໄດ້ 70% ພາຍໃນປີ 2025 ນອກຈາກນີ້ ລັດຖະບານເວລສກໍກຽມຕັ້ງກອງທຶນມູນຄ່າ 6,5 ລ້ານປອນ (ສະກຸນເງິນອັງກິດ) ເພື່ອກະຕຸ້ນໃຫ້ຜູ້ຜະລິດສິນຄ້າພາຍໃນປະເທດ.
5. ສະວິດເຊີແລນ ຊຶ່ງມີອັດຕາຣີໄຊເຄິລຂີ້ເຫຍື້ອທີ່ 49,7% ເມື່ອປີ 2018 ໜຶ່ງໃນ ນັ້ນຖືເປັນກຸນແຈສຳຄັນຂອງການພັດທະນາລະບົບດັ່ງກ່າວນັ້ນກໍຄື ນະໂຍບາຍ “ຄົນກໍ່ມົນລະພິດຈ່າຍ” ໂດຍໃຫ້ພາກທຸລະກິດ ຜູ້ຜະລິດ ແລະ ປະຊາຊົນເປັນຄົນ ຕ້ອງເປັນຄົນຈ່າຍຄ່າຂີ້ເຫຍື້ອປະເພດທີ່ບໍ່ສາມາດນຳມາຣີໄຊເຄິລໄດ້ທີ່ເຂົາເຈົ້າຜະລິດຂຶ້ນມາເອງ.

ຮຽບຮຽງ: ສະຫະລັດ ວອນທິວົງໄຊ

ຮູບພາບ: thairath