ນັກປະດິດຊາວໂປແລນສ້າງເຕັກໂນໂລຊີຫວັງຊ່ວຍອະນຸຮັກສິ່ງແວດລ້ອມອີກທາງໜຶ່ງ ໂດຍໄດ້ຜະລິດຈານກິນກິນຊຶ່ງຜະລິດມາຈາກສ່ວນຜະສົມຂອງເຂົ້າສາລີ ຊຶ່ງເຕັມໄປດ້ວຍເສັ້ນໃຍອາຫານ ແລະ ໂພຊະນາການທີ່ອຸດົມສົມບູນ.
ຊຶ່ງໂຮງງານຜະລິດຈານກິນໄດ້ມີຊື່ວ່າ ໄບໂອເທຣມ (Biotrem) ຕັ້ງຢູ່ເມືອງຊຳບຣູຟ ທາງພາກຕາເວັນອອກສຽງເໜືອຂອງໂປແລນ ຊຶ່ງຈານກິນໄດ້ຊະນິດນີ້ຈະບໍ່ມີລົດຊາດ ແຕ່ທີ່ສຳຄັນຈານຊະນິດນີ້ສາມາດຍ່ອຍສະຫຼາຍໄດ້ຕາມທຳມະຊາດ “ໃນຂະບວນການຜະລິດຈານກິນໄດ້ແມ່ນໃຊ້ພຽງສ່ວນປະສົມຂອງແປ້ງສາລີເທົ່ານັ້ນ ຊຶ່ງໄດ້ນຳໄປອັດດ້ວຍແຮງດັນ ແລະ ອຸນຫະພູມທີ່ແນ່່ນອນ ໂດຍໃຊ້ເຄື່ອງຈັກທີ່ໄດ້ອອກແບບມາເພື່ອຜະລິດຈານຊະນິດນີ້ໂດຍສະເພາະ”.
ນອກຈາກນີ້ ເຕັກໂນໂລຊີດຽວກັນນີ້ກໍຍັງສາມາດໃຊ້ຜະລິດຈານທີ່ມີສ່ວນປະສົມທາງການກະເສດຊະນິດອື່ນໆເຊັ່ນ ເຂົ້າບາເລ ມັນດ້າງ ລວມເຖິງສາຫຼ່າຍ ແລະ ອື່ນໆ ຊຶ່ງຈະໄດ້ລົດຊາດທີ່ແຕກຕ່າງຈາກສ່ວນປະສົມທີ່ເຮັດມາຈາກແປ້ງສາລີ ທັງນີ້ ຜູ້ບໍລິໂພກບໍ່ຈຳເປັນຕ້ອງກິນຈານຊະນິດນີ້ກໍໄດ້ ເນື່ອງຈາກວ່າຈຸດປະສົງຂອງການຜະລິດຂຶ້ນມາກໍເພື່ອເປົ້າໝາຍທີ່ເປັນມິດກັບສະພາບແວດ ລ້ອມ ຊຶ່ງເມື່ອຈານຊະນິດນີ້ຢູ່ໃນສະພາບແວດລ້ອມທີ່ເອື້ອອຳນວຍ ບວກກັບຄວາມຊຸ່ມເລັກໜ້ອຍ ກໍຈະເຮັດໃຫ້ຜະລິດຕະພັນດັ່ງກ່າວຍ່ອຍສະຫຼາຍໄດ້ພາຍໃນ 1 ເດືອນ ຫຼື ຖ້າຫາກຢູ່ໃນຊ່ວງລະດູຝົນກໍອາດຈະໃຊ້ເວລາໃນການຍ່ອຍສະຫຼາຍພຽງແຕ່ 2 ອາທິດເທົ່ານັ້ນ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: mgronline.com