ຖືເປັນຂ່າວທີ່ໜ້າເສົ້າອີກຂ່າວໜຶ່ງເມື່ອສຳນັກຂ່າວຕ່າງປະເທດໄດ້ລາຍງານເມື່ອວັນທີ 31 ພຶດສະພາຜ່ານມາເຖິງຜົນການກະທຳຂອງມະນຸດທີ່ກະທົບເຖິງສັດໂລກ ພາຍຫຼັງທີ່ມີປະຊາຊົນໃນເຂດສະແຄຣບເຕີຣ ບໍລິເວນອ່າວທູຣໂຊ ທາງຕອນເໜືອຂອງສະກ໊ອດແລນ ພົບເຫັນຮ່າງໄຮ້ວິນຍານຂອງປາວານຫຼັງຄ້ອມຊຶ່ງມີຂະໜາດຄວາມຍາວເຖິງ 9 ແມັດຢູ່ແຄມຝັ່ງທະເລເຄທເນສ ທັງນີ້ ຈາກການກວດສອບເບື້ອງຕົ້ນພົບວ່າ ຢູ່ຕາມໂຕຂອງປາໂຊກຮ້າຍໂຕນີ້ມີເຊືອກປະມົງຮັດແໜ້ນຢູ່ກາງລຳໂຕຈິ່ງໄດ້ສັນນິຖານວ່າ ເຊືອກດັ່ງກ່າວເປັນຕົ້ນເຫດທີ່ເຮັດໃຫ້ປາວານຕາຍ.
ຂະນະທີ່ນັກເຄື່ອນໄຫວເພື່ອສິ່ງແວດລ້ອມລະບຸວ່າ ເຖິງວ່າຈະຍັງບໍ່ມີການຊັນລະສູດຮ່າງຂອງປາວານໂຕດັ່ງກ່າວ ແຕ່ວ່າສະພາບພາຍນອກກໍຊີ້ໃຫ້ເຫັນວ່າ ປາວານໂຕນີ້ຕາຍຢ່າງທຸກທໍລະມານຈາກການຖືກເຊືອກຮັດ “ຂະນະທີ່ມັນຖືກເຊືອກຮັດກໍອາດມີຊີວິດຢູ່ໄດ້ຫຼາຍມື້ ຫຼື ຫຼາຍອາກທິດກ່ອນຈະບໍ່ສາມາດເໜັງຕີງໄດ້ ແລະ ສົ່ງຜົນໃຫ້ຮ່າງກາຍອ່ອນແອລົງເລື້ອຍໆຈົນບໍ່ສາມາດລອຍນ້ຳໄດ້ ແລະ ຄ່ອຍໆສິ້ນໃຈດ້ວຍຄວາມທໍລະມານ”.
ທັງນີ້ ການຖືກຮັດ ຫຼື ພັນດ້ວຍວັດຖຸແປກປອມຄວາມຄຸມເຖິງເຄື່ອງມືການປະມົງ ເຊືອກ ຫຼື ພລາສຕິກ ຊຶ່ງເປັນໜຶ່ງໃນສາເຫດຫຼັກທີ່ເຮັດໃຫ້ສັດນ້ຳຕາຍເປັນຈຳນວນຫຼາຍ ໂດຍຄະນະກຳມະການລ່າປາວານ (IWC) ໄດ້ລະບຸຕື່ມວ່າ ໃນແຕ່ລະປີມີວານ ແລະ ປາໂລມາຫຼາຍກວ່າ 300.000 ໂຕຕາຍຍ້ອນແຫ ສາຍເບັດ ເຊືອກ ແລະ ອື່ນໆ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: khaosod