ສຳນັກຂ່າວຕ່າງປະເທດລາຍງານເມື່ອວັນທີ 2 ມິຖຸນາຜ່ານມາວ່າ ກະຊວງການຕ່າງປະເທດຂອງອາເມຣິກາເລີ່ມນຳໃຊ້ມາດຕະການໃໝ່ສຳລັບຜູ້ທີ່ຍື່ນຂໍວີຊ້າເຂົ້າປະເທດ ຍົກເວັ້ນນັກການທູດ ແລະ ຂ້າລາຊະການ ໂດຍຕ້ອງໄດ້ສະແດງຂໍ້ມູນການໃຊ້ໂຊຊຽວມີເດຍຢ່າງຖືກຕ້ອງ ພາຍຫຼັງຮັບຮອງກົດດັ່ງກ່າວໃນລັດຖະບານຂອງ ທ່ານ ໂດນັລ ທຣັມ ທີ່ສະເໜີເມື່ອປີ 2018.
ໂດຍມາດຕະການດັ່ງກ່າວໄດ້ເພີ່ມການກວດສອບທີ່ເຂັ້ມງວດຂຶ້ນ ທັງນີ້ ກໍເພື່ອຄວບຄຸມການລັກລອບເຂົ້າເມືອງຂອງການການອາເມຣິກາໃນຍຸກ ທ່ານ ທຣັມ ທີ່ໃຊ້ເປັນຜົນງານຫາສຽງຊິງຕຳແໜ່ງປະທານາທິບໍດີ ຂະນະທີ່ຜູ້ຍື່ນຄຳຮ້ອງຈະຕ້ອງສົ່ງຊື່ບັນຊີທີ່ຊ້ໃນໂຊຊຽນມີເດຍ ລວມເຖິງອີເມລ ແລະ ເບີໂທລະສັບທີ່ໃຊ້ໃນຊ່ວງ 5 ປີຄືນຫຼັງ ຊຶ່ງຄາດວ່າຈະສົ່ງຜົນກະທົບເຖິງຄົນຈຳນວນ 14,7 ລ້ານຄົນຕໍ່ປີ ລວມເຖິງຜູ້ທີ່ເດີນທາງໄປເຮັດວຽກ ຫຼື ສຶກສາທີ່ສະຫະລັດອາເມຣິກາ.
ທັງນີ້ ກໍໄດ້ມີການແຈ້ງເຕືອນວ່າ ຫາກບຸກຄົນໃດໃຫ້ຂໍ້ມູນປອມກ່ຽວກັບການນຳໃຊ້ໂຊຊຽວມີເດຍກໍຈະສົ່ງຜົນກະທົບຮ້າຍແຮງຕາມມາ ຂະນະທີ່ກະຊວງການຕ່າງປະເທດໄດ້ລະບຸອີກວ່າ “ພວກເຮົາກຳລັງຫາກົນໄກເພື່ອພັດທະນາຂະບວນການກັ່ນກອງຄົນເຂົ້າເມືອງເພື່ອຄຸ້ມຄອງພົນລະເມືອງອາເມຣິກາ ຂະນະດຽວກັນກໍສະໜັບສະໜູນການເດີນທາງເຂົ້າອາເມຣິກາຢ່າງຖືກຕ້ອງຕາມກົດໝາຍເຊັ່ນກັນ” ຊຶ່ງກ່ອນໜ້ານີ້ມີພຽງຜູ້ຍື່ນຄຳຮ້ອງຂໍວີຊ້າທີ່ເປັນຄົນຢູ່ໃນພື້ນທີ່ໆກຸ່ມກໍ່ການຮ້າຍຄວບຄຸມຢູ່ເທົ່ານັ້ນທີ່ທາງການອາເມ ຣິກາຕ້ອງການຂໍ້ມູນໂຊຊຽວມີເດຍເພື່ອກວດສອບເປັນກໍລະນີພິເສດ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: Getty Images