ແມ່ເຖົ້າແມຣີ ວິສຮູເຊັນ ຊາວອາເມຣິກາອາຍຸ 77 ປີ ເຖິງກັບຕົກໃຈຢ່າງແຮງຂະນະທີ່ຕື່ນຂຶ້ນມາກາງເດິກແລ້ວພົບກັບແຂ້ໂຕໃຫຍ່ຂະໜາດຍາວກວ່າ 3 ແມັດເຂົ້າມາໃນເຮືອນ ດັ່ງນັ້ນ ແມ່ເຖົ້າຈຶ່ງໄດ້ໂທແຈ້ງເຈົ້າໜ້າທີ່ເຂົ້າມາຊ່ວຍເຫຼືອ.
ລາຍງານຂ່າວຕ່າງປະເທດເມື່ອວັນທີ 1 ມິຖຸນາຜ່ານມາໃຫ້ຮູ້ວ່າ ເກີດເຫດແຂ້ໂຕໃຫຍ່ບຸກເຂົ້າເຮືອນຂອງປະຊາຊົນໃນເຂດເມືອງເຄລຍວໍເຕີຣ ລັດຟໍຣິດາ ຊຶ່ງເຈົ້າໜ້າທີ່ໄດ້ຮັບແຈ້ງເຫດສຸກເສີນຈຶ່ງໄປທີ່ຈຸດເກີດເຫດກໍຄືເຮືອນຂອງແມ່ເຖົ້າແມຣີ ແລະ ເມື່ອມາຮອດກໍພົບກັບແຂ້ໂຕໃຫຍ່ຍາວຂະໜາດ 3,35 ແມັດທີ່ເຂົ້າມາໃນເຮືອນຂອງແມ່ເຖົ້າ ຂະນະທີ່ເຮືອນຂອງແມ່ເຖົ້າເກີດຄວາມເສຍຫາຍເລັກນ້ອຍ (ແວ່ນປ່ອງຢ້ຽມແຕກ).
ທັງນີ້ ເຈົ້າໜ້າທີ່ກໍໄດ້ໂພສຄລິບວິດິໂອຜ່ານທາງທະວິຕເຕີຂອງສຳນັກງານຕຳຫຼວດເມືອງເຄລຍວໍເຕີຣທີ່ບັນທຶກເຫດການຈັບແຂ້ໂຕດັ່ງກ່າວ ພ້ອມນີ້ ກໍໄດ້ໂພສຂໍ້ຄວາມໃນທະວິຕເຕີວ່າ ລະຫວ່າງທີ່ພະຍາຍາມຈັບແຂ້ໂຕນີ້ “ເຮັດໃຫ້ແກ້ວວາຍແດງແຕກຫຼາຍແກ້ວ ແລະ ທີ່ເຫັນຢູ່ພື້ນຫ້ອງຄົວນັ້ນເປັນພຽງວາຍບໍ່ແມ່ນເລືອດ”.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: @@myclearwaterPD