ຄື້ນຄວາມຮ້ອນແຜ່ປົກຄຸມພາກເໜືອຂອງປະເທດອິນເດຍວັດແທກອຸນຫະພູມໃນລັດຣາຊາສະຖານສູງເຖິງ 50 ອົງສາ ພ້ອມນີ້ ກໍມີລາຍງານວ່າປະຊາຊົນຈຳນວນຫຼາຍທົນກັບສະພາບອາກາດຮ້ອນອົບເອົ້າບໍ່ໄຫວສົ່ງຜົນໃຫ້ມີຄົນເສຍຊີວິດແລ້ວຫຼາຍຮ້ອຍລາຍ.
ສຳນັກຂ່າວຕ່າງປະເທດລາຍງານຈາກນະຄອນຫຼວງນິວເດລີເມື່ອວັນທີ 2 ມິຖຸນາຜ່ານມາວ່າ ສຳນັກອຸຕຸນິຍົມວິທະຍາແຫ່ງຊາດອິນເດຍ (IMD) ໄດ້ອອກມາຖະແຫຼງວ່າ ອຸນຫະພູມຢູ່ເມືອງຊູຣູ ເຂດທະເລຊາຍໃນລັດຣາຊາສະຖານທາງພາກເໜືອວັດແທກອຸນຫະພູມໄດ້ເຖິງ 50,6 ອົງສາ ແລະ ທົ່ວລັດພວມຜະເຊີນກັບອາກາດຮ້ອນທີ່ສຸດ ຂະນະທີ່ອີກຫຼາຍເມືອງກໍວັດແທກອຸນຫະພູມໄດ້ສູງເກີນ 47 ອົງສາ.
ທັງນີ້ ເດືອນເມສາ 2015 ເມືອງພາໂລດີໃນລັດຣາຊາສະຖານກໍເຄີຍເຮັດສະຖິຕິອາກາດຮ້ອນສູງສຸດເທົ່າທີ່ເຄີຍປາກົດມີ ຊຶ່ງສາມາດວັດແທກອຸນຫະພູມໄດ້ເຖິງ 51 ອົງສາ ຂະນະທີ່ໂຄສົກຂອງ IMD ກໍໄດ້ກ່າວວ່າ ອາກາດຮ້ອນຮຸນແຮງອາດແກ່ຍາວເຖິງ 1 ອາທິດຢູ່ໃນຫຼາຍໆລັດຄື ລັດຣາຊາສະຖານ ລັດມະຫາຣາດ ລັດມັດຢະປະເທດ ລັດບັນຈາບ ລັດຫໍຣະຢານະ ແລະ ລັດອຸຕຕະຣະປະເທດ ແລະ ຫຼ້າສຸດ ມີລາຍງານຜູ້ເສຍຊີວິດຈາກລົດແດດແລ້ວຫຼາຍຮ້ອຍລາຍ.
ໂດຍທາງການອິນເດຍກໍເຄີຍປະກາດເຕືອນໄພພາວະອາກາດຮ້ອນຮຸນແຮງລະດັບສີແດງໃນເຂດນະຄອນຫຼວງນິວເດລີພາຍຫຼັງທີ່ອຸນຫະພູມເພີ່ມສູງຂຶ້ນເກີນ 46 ອົງສາ ໂດຍເຈົ້າໜ້າທີ່ໄດ້ປະກາດແນະນຳໃຫ້ປະຊາຊົນຫຼີກເວັ້ນການອອກນອກອາຄານ ບ້ານເຮືອນ ໃນຊົ່ວໂມງອາກາດຮ້ອນຖ້າບໍ່ຈຳເປັນ ຂະນະທີ່ເມືອງໃຫຍ່ຫຼາຍໆແຫ່ງໂດຍສະເພາະເມືອງເຈນໄນ ຫຼື ອະມັທຣາສເກົ່າ ຊຶ່ງກຳລັງວິຕົກກັງວົນກ່ຽວກັບພາວະຂາດແຄນນ້ຳ ເນື່ອງຈາກລະດັບນ້ຳໃນທະເລສາບ ແລະ ແມ່ນ້ຳສາຍຕ່າງໆກຳລັງຫຼຸດລະດັບລົງເລື້ອຍໆ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AFP, AP