ກະຊວງສາທາລະນະສຸກຣັດເຊຍເປີດເຜີຍເມື່ອວັນທີ 2 ມິຖຸນາຜ່ານມາວ່າ ເກີດເຫດລະເບີດໃນໂຮງງານຜະລິດລະເບີດ ທີເອັນທີ (TNT) ເມື່ອວັນທີ 1 ມິຖຸນາ ສົ່ງຜົນໃຫ້ມີຜູ້ໄດ້ຮັບບາດເຈັບ 79 ຄົນ.
ເຫດລະເບີດດັ່ງກ່າວແມ່ນເກີດຢູ່ໃນໂຮງງານຜະລິດ TNT ຊຶ່ງຕັ້ງໃນເມືອງເຊີຣຊິນສ ຫ່າງໄປທາງຕາເວັນອອກຂອງນະຄອນຫຼວງມົສກູ 400 ກີໂລແມັດ ຂະນະທີ່ເຈົ້າໜ້າທີ່ພວມເລັ່ງສືບສວນ-ສອບສວນຫາສາເຫດ.
ທັງນີ້ ກະຊວງສາທາລະນະສຸກຂອງຣັດເຊຍໄດ້ອອກມາຖະແຫຼງວ່າ ພົບຜູ້ໄດ້ຮັບບາດເຈັບ 79 ຄົນ ໃນນັ້ນ ແມ່ນພະນັກງານ-ກຳມະກອນ 38 ຄົນ ແລະ 14 ຄົນເປັນປະຊາຊົນໃນເຂດໃກ້ຄຽງ ຊຶ່ງມີ 15 ຄົນຕ້ອງນອນປິ່ນປົວຢູ່ໂຮງໝໍ ແລະ ມີ 1 ຄົນອາການສາຫັດ ຂະນະທີ່ແຮງລະເບີດກໍໄດ້ເຮັດໃຫ້ອາຄານບ້ານເຮືອນໃນເຂດໃກ້ຄຽງຫຼາຍກວ່າ 180 ຫຼັງໄດ້ຮັບຄວາມເສຍຫາຍ.
ຮຽບຮຽງ: ສະຫະລັດ ວອນທິວົງໄຊ
ຮູບພາບ: AP