ໃນວັນທີ 31 ພຶດສະພາ 2019 ທີ່ສະໜາມບິນສາກົນວັດໄຕ ນະຄອນຫຼວງວຽງຈັນ ກະຊວງສາທາລະນະສຸກຮ່ວມກັບສະມາພັນຄວບຄຸມຢາສູບແຫ່ງອາຊຽນ ກະຊວງໂຍທາທິການ ແລະ ຂົນສົ່ງ ລວມທັງອົງການອະນາໄມໂລກ ໄດ້ຈັດງານສະເຫຼີມສະຫຼອງວັນງົດສູບຢາໂລກພາຍໃຕ້ຄຳຂວັນ ການສູບຢາພາໃຫ້ເປັນພະຍາດປອດ ແລະ ທັງເປັນການປະກາດຫ້າມສູບຢາພາຍໃນອາຄານທັງໝົດຂອງສະໜາມບິນສາກົນວັດໄຕ ແລະ ທຸກສະໜາມບິນໃນ ສປປ ລາວ ໃຫ້ເປັນສະໜາມບິນປອດຄວັນຢາສູບ ເພື່ອປົກປ້ອງສຸຂະພາບຂອງບັນດາພະນັກງານ ເຈົ້າໜ້າທີ່ ຜູ້ທີ່ເຂົ້າມາຢ້ຽມຢາມ ແລະ ຜູ້ໂດຍສານຈາກອັນຕະລາຍຂອງການໄດ້ຮັບຄວັນຢາສູບມືສອງ ທັງເປັນການສ້າງສະພາບແວດລ້ອມທີ່ສົດໃສ ແລະ ການສ້າງຄວາມປອດໄພໃຫ້ແກ່ສະໜາມບິນຂອງ ສປປ ລາວ.

ທ່ານ ສັນຕິສຸກ ສິມມາລາວົງ ຮອງລັດຖະມົນຕີ ກະຊວງໂຍທາທິການ ແລະ ຂົນສົ່ງ ກ່າວວ່າ ສະໜາມບິນສາກົນວັດໄຕໄດ້ປິດຫ້ອງສູບຢາທີ່ຢູ່ພາຍໃນອາຄານທັງພາຍໃນ ແລະ ຕ່າງປະເທດນັບແຕ່ວັນທີ 20 ພຶດສະພາ 2019 ຜ່ານມາ ແລະ ໃຫ້ຜູ້ສູບຢາທັງໝົດ ລວມທັງພະນັກງານ-ເຈົ້າໜ້າທີ່ສະໜາມບິນຜູ້ໂດຍສານ ແລະ ບຸກຄົນອື່ນໆໄປສູບຢາຢູ່ບ່ອນທີ່ອະນຸຍາດໃຫ້ສູບຢາທີ່ທາງສະໜາມບິນໄດ້ຈັດໄວ້ ຊຶ່ງມີປ້າຍບອກຢ່າງຈະແຈ້ງ ນອກນີ້ ຍັງບໍ່ອະນຸຍາດໃຫ້ສູບຢາຢູ່ໃກ້ອາຄານຕ່າງໆ ໂດຍສະເພາະທາງເຂົ້າ-ອອກ ແລະ ທາງຍ່າງດ້ານໜ້າອາຄານສະໜາມບິນ ສຳລັບຜູ້ທີ່ລະເມີດຈະຖືກກ່າວເຕືອນ ເມື່ອໄດ້ທຳຜິດເທື່ອທຳອິດ ແລະ ຈະຖືກປັບໄໝ 200.000 ກີບ ສຳລັບການລະເມີດເທື່ອທີສອງ ຊຶ່ງຜູ້ທີ່ກະທຳຜິດຊ້ຳໆຈະຖືກປັບໄໝຄັ້ງລະ 400.000 ກີບ.

ທ່ານ ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກກ່າວວ່າ ການປະກາດໃຫ້ເປັນສະໜາມບິນສາກົນວັດໄຕປອດຄວັນຢາສູບນີ້ເປັນແຫ່ງທຳອິດຂອງ ສປປ ລາວ ແລະ ເປັນປະເທດທີ 3 ຂອງອາຊຽນຖັດຈາກປະເທດ ບຣູໄນ ແລະ ໄທ ຈາກການສຳຫຼວດແຫ່ງຊາດກ່ຽວກັບການສູບຢາຂອງຜູ້ໃຫຍ່ໃນປີ 2015 ພົບວ່າ ການໄດ້ຮັບຄວັນຢາສູບພາຍໃນສະຖານທີ່ສາທາລະນະຍັງສູງ ໂດຍສະເພາະການໄດ້ຮັບຄວັນຢາສູບພາຍໃນອາຄານບ່ອນເຮັດວຽກສູງເຖິງ 63% ດັ່ງນັ້ນ ຈິ່ງຮຽກຮ້ອງໃຫ້ທຸກຄົນຕ້ອງເພີ່ມທະວີການມີສ່ວນຮ່ວມ ແລະ ເປັນເຈົ້າການໃນການປົກປ້ອງສຸຂະພາບຕົນເອງ ແລະ ຄົນອ້ອມຂ້າງຈາກຄວັນຢາສູບ ແລະ ໃຫ້ຜູ້ສູບຢາມາສູບຢູ່ບ່ອນອະນຸຍາດສູບຢາເທົ່ານັ້ນ.

ໂດຍ: ສະຫະລັດ ວອນທິວົງໄຊ